ప్రియుడిని కొట్టి చంపిన ప్రియురాలి పేరెంట్స్, బంధువులు..

ప్రియురాలి కోసం ఆమె ఊరెళ్లిన ప్రియుడు అడ్డంగా దొరికిపోయాడు. ఆగ్రహం చెందిన ప్రియురాలి పేరెంట్స్, బంధువులు కలసి చావబాదడంతో ప్రాణాలు కోల్పోయాడు. ప్రియుడిని రక్షించుకునేందుకు ప్రియురాలు రెండు కిలోమీటర్ల దూరం పరుగెత్తుకెళ్లినా ప్రయోజనం లేకుండా పోయింది. ఈ విషాదక ఘటన యూపీలోని ఆగ్రాలో చోటుచేసుకుందని టీఓఐ కథనం పేర్కొంది.మధురలోని ఓ గ్రామానికి చెందిన టీనేజ్ యువకుడి(17)కి తొమ్మిదో తరగతి చదవుతున్న బాలిక(14)తో కొద్దినెలల కిందట పరిచయమైంది. ఆ పరిచయం ప్రేమగా మారింది. ప్రియురాలిని కలిసేందుకు ప్రియుడు స్నేహితుడితో కలసి ఆమె గ్రామానికి వెళ్లిన సమయంలో ఆమె తల్లిదండ్రులకు దొరికిపోయాడు. ఇద్దరివీ వేర్వేరు కులాలు కావడంతో పెద్దలు ఆగ్రహంతో రగిలిపోయారు. ఆమె తల్లిదండ్రులు, బంధువులు టీనేజర్‌ని చుట్టుముట్టి తీవ్రంగా కొట్టారు.అది చూసి భయపడిపోయిన ప్రియురాలు తన ప్రియుడిని రక్షించుకునేందుకు అతని స్వగ్రామానికి పరుగెత్తుకెళ్లింది. కనీసం కాళ్లకు చెప్పుల్లేకుండా వేగంగా పరిగెత్తుకుంటూ వెళ్లి ప్రియుడి కుటుంబ సభ్యులకు విషయం చెప్పి భోరుమంది. తమ బంధువులు అతన్ని చావబాదుతున్నారని.. త్వరగా వచ్చి కాపాడాలంటూ వేడుకుంది. అప్రమత్తమైన అతని కుటుంబ సభ్యులు పోలీసులను వెంటబెట్టుకుని ఆ గ్రామానికి చేరుకున్నారు. అప్పటికే టీనేజర్ అపస్మారక స్థితిలో పడిపోయి ఉన్నాడు.అతన్ని వెంటనే సమీపంలోని ఆస్పత్రికి తీసుకెళ్లగా అప్పటికే చనిపోయినట్లు వైద్యులు ధ్రువీకరించారు. అమ్మాయి బంధువుల దాడిలో తీవ్రంగా గాయపడిన ప్రియుడు ప్రాణాలు కోల్పోయాడు. గ్రామానికి రమ్మని చెప్పినందుకు తాను కూడా తల్లిదండ్రుల ఆగ్రహానికి గురవుతానని భయపడిన బాలిక పొలాల్లో దాక్కుని ప్రాణాలు కాపాడుకుంది. గ్రామానికి చేరుకున్న పోలీసులు కొద్దిగంటల పాటు వెతికి ఆమె ఆచూకీ కనుగొన్నారు.ఇద్దరివీ స్థానికంగా బలమైన సామాజిక వర్గాలు కావడంతో పోలీసులు అప్రమత్తమయ్యారు. ఎలాంటి అవాంఛనీయ ఘటనలు జరగకుండా పోలీసులను భారీగా మోహరించారు. ఈ ఘటనకు సంబంధించి ఏడుగురిపై హత్య కేసు నమోదు చేశారు. నలుగురు నిందితులను ఇప్పటికే అదుపులోకి తీసుకున్నారు. మిగిలిన వారి కోసం గాలింపు చర్యలు కొనసాగుతున్నాయని ఎస్‌ఎస్పీ గౌరవ్ గ్రోవర్ తెలిపారు.