2.9 సెకన్లకే 100 కిలోమీటర్ల వేగం వెళ్లే కారు లాంచ్

లగ్జరీ కార్లను ఉత్పత్తి చేసి వాటిని విక్రయించడంలో పేరెన్నికగన్న సంస్థ ఫెర్రారీ. ఈ ఇటాలియన్ కార్ల తయారీ సంస్థ విలాసవంతమైన కార్లను ఉత్పత్తి చేయడమే కాకుండా అత్యుత్తమ విక్రయాలు అందుకుంటోంది. ఇటీవలే ఈ సంస్థ నుంచి సరికొత్త వాహనం ఫెర్రారీ ఎఫ్8 ట్రిబ్యూటో మోడల్ విడుదలైంది. ఎక్స్ షోరూంలో ఈ కారు ధర రూ.4.02 కోట్లుగా సంస్థ నిర్దేశించింది. తాజాగా ఈ కారును విక్రయానికి ఉంచింది ఫెర్రారీ సంస్థ. ఫెర్రారీలోని పాపులరైన 488 జీటీబీ మోడల్ తర్వాత అందుబాటులోకి వచ్చిన ఈ సరికొత్త సూపర్ కారులో మిడ్ ఇంజిన్ ను అమర్చారు. ఫెర్రారీ ఎఫ్8 ట్రిబ్యూటో నాన్ హైబ్రిడ్ వీ8 పవర్డ్ ఆప్షన్ ను కలిగిన చివరి సూపర్ కారు. ఈ వాహనాన్ని 2019 జెనీవా మోటార్ షోలోనే తొలిసారిగా ప్రదర్శించారు. అత్యాధునిక హంగులు, వేగం, ఇంజిన్, సాంకేతికతతో అందుబాటులోకి వచ్చిన ఫెర్రారీ ఎఫ్8 ట్రిబ్యూటో సూపర్ కారు ఆకట్టుకుంటోంది.ఈ సరికొత్త ఎఫ్8 ట్రిబ్యూటో మోడల్ 3.9-లీటర్ ట్విన్ టర్బో ఛార్జెడ్ వీ8 పెట్రోల్ ఇంజిన్ ను కలిగి ఉంది. ఇది 720 బీహెచ్ పీ బ్రేక్ హార్స్ పవర్, 770 ఎన్ఎం టార్క్ ను ఉత్పత్తి చేస్తుంది. అంతేకాకుండా 7-స్పీడ్ డ్యూయల్ క్లచ్ ఆటోమేటిక్ స్టాండర్డ్ గేర్ బాక్స్ వ్యవస్థతో ఇది పనిచేస్తుంది. మిడ్ ఇంజిన్ రేంజ్ లో ఇప్పటివరకు వచ్చిన ఫెర్రారీ కార్లలో ఇదే అత్యంత వేగవంతమైన కారని ఆ సంస్థ తెలిపింది. గరిష్ఠంగా గంటకు 340 కిలోమీటర్ల వేగంతో దూసుకెళ్తుంది. అంతేకాకుండా 0 నుంచి 100 కిలోమీటర్ల వేగాన్ని కేవలం 2.9 సెకండ్లలోనే అందుకుంటుంది. 0 నుంచి 200 కిలోమీటర్ల వేగాన్ని కేవలం 7.8 సెకండ్లలోనే అధిగమిస్తుంది. అంతేకాకుండా దీని ముందు మోడల్ తో పోలిస్తే 40 కేజీలు బరువు తక్కువగాను, 15 శాతం ఎక్కువ డౌన్ ఫోర్స్ తో అందుబాటులోకి వచ్చిందని ఫెర్రారీ స్పష్టం చేసింది.ఫెర్రారీ ఎఫ్8 మోడల్ కాక్ పిట్ ను పరిశీలిస్తే మొత్తం డిజిటల్ స్క్రీన్లతో అదరగొడుతోంది. 7.0-అంగుళాల టచ్ స్క్రీన్ ఇంఫోటైన్మెంట్ సిస్టం, ఫ్లాట్ బాటమ్ స్టీరింగ్ వీల్, లార్డ్ ప్యాడిల్ షిఫ్టర్లు తదితర ఫీచర్లు ఇందులో ఉన్నాయి. అంతేకాకుండా దీని ముందు మోడల్ 488 జీటీబీతో పోలిస్తే పూర్తిగా ఈ కారు డిజైన్ ను పునరుద్ధరించారు. డ్రైవర్ సెంట్రిక్ కాక్ పిట్ తో సహా డ్యాష్ బోర్డు, ప్రీమియం లెదర్ మెటిరీయల్స్, కార్బన్ ఫైబర్ ట్రిమ్స్ వాటిని పూర్తిగా మార్చారు. రీఫ్రెష్డ్ హెడ్ ల్యాంపులు, స్పాయిలర్ మార్పులతో డిజైన్ ను రూపొందించారు. అంతేకాకుడా ఈ సరికొత్త ఎఫ్8 ట్రిబ్యూటో మోడల్ స్టైలిష్, స్పోర్టీ అగ్రెసివ్ లుక్ తో ముందు మోడల్ తో పోలిస్తే ఆకట్టుకుంటోంది.