ఆపరేషన్ ప్రకాశం బ్యారేజీ.. ప్లాన్ 5 అయినా సక్సెస్ అవుతుందా
Andhra Pradesh Telugu | Suryaa Desk | Published : Mon, Sep 16, 2024, 09:52 PM
విజయవాడలోని ప్రకాశం బ్యారేజీ గేట్ల వద్ద చిక్కుకున్న బోట్ల తొలగింపు ప్రక్రియ సవాల్‌గా మారింది. ఏడో రోజూ బోట్ల వెలికితీత పనుల్లో బెకెమ్‌ సంస్థ ఇంజినీర్లు, అధికారులు, సిబ్బంది తీవ్రంగా శ్రమిస్తున్నారు. ఇప్పటివరకు అమలు చేసిన నాలుగు వ్యూహాలు విఫలమవడంతో మరో కొత్త ప్లాన్‌తో బోట్లను బయటకు తెచ్చేందుకు ప్రయత్నాలు ప్రారంభించారు. డ్యామ్‌లో ఇరుక్కున్న బోట్లను వేరే బోట్ల సహాయంతో బయటకు తీసుకొచ్చేందుకు ప్రయత్నిస్తున్నారు. నదిలో ఇసుకను డ్రెడ్జింగ్‌ చేసే రెండు భారీ ఇసుక బోట్లను ఇనుప గడ్డర్లతో అనుసంధానించిన ఇంజినీర్లు.. వాటిని ప్రకాశం బ్యారేజీ గేట్ల వద్దకు తీసుకువచ్చారు. ఈ ఇసుక బోట్లు ఒక్కోటి 40 టన్నుల బరువు ఉంటుంది. ఈ రెండు భారీ బోట్లు 300 టన్నులకు పైగా బరువును అవలీలగా లాగేలా గడ్డర్లను అమర్చారు. ప్రకాశం బ్యారేజీ 67వ గేటు వద్ద చిక్కుకున్న భారీ బోటును పైకి తీసుకొచ్చి రెండు పడవల మధ్య భాగంలో గొలుసులు, రోప్‌లతో గట్టిగా కట్టారు. రెండు పడవలను ఒకేసారి నడుపుతూ చిక్కుకున్న పడవను ఒడ్డుకు లాక్కుని వచ్చేలా ప్రణాళికను అమలు చేస్తున్నారు. ఈ ప్లాన్ సక్సెస్ అవుతుందా, లేదా అని విజయవాడ వాసులు ఆసక్తిగా ఎదురుచూస్తున్నారు.
|
|