చంద్రగిరి అసెంబ్లీ నియోజకవర్గం టీడీపీ అభ్యర్థి పులివర్తి నానిపై జరిగిన దాడి రాష్ట్రవ్యాప్తంగా సంచలనం రేకెత్తించిన సంగతి తెలిసిందే. తిరుపతిలోని పద్మావతి మహిళా యూనివర్సిటీలోని స్ట్రాంగ్ రూమ్ పరిశీలనకు వెళ్లిన పులివర్తి నాని.. కారుపై కొంతమంది దాడి చేశారు. అయితే ఈ దాడి వైసీపీ శ్రేణులు చేశారంటూ టీడీపీ నేతలు ఆరోపణలు చేశారు. దీనిపై కేసు కూడా నమోదైంది. అయితే పులివర్తి నానిపై జరిగిన దాడి విషయంలో.. చంద్రగిరి సిట్టింగ్ ఎమ్మెల్యే, వైసీపీ అభ్యర్థి చెవిరెడ్డి భాస్కర్ రెడ్డి సంచలన ఆరోపణలు చేశారు. ఈ మేరకు విలేకర్ల సమావేశం నిర్వహించిన చెవిరెడ్డి భాస్కర్ రెడ్డి.. దాడి గురించి కీలక వ్యాఖ్యలు చేశారు. వీడియో ప్రజెంటేషన్ ఇచ్చారు. అందులో దాడి తర్వాత నాని నడుచకుంటూ వెళ్లారని ఆరోపించారు.
" మహిళా యూనివర్సిటీ వద్ద పులివర్తి నాని కారుపై దాడి చేశారు. ఆయనపై దాడి చేయలేదు. ఆ దాడిని నేనూ ఖండిస్తున్నా. కారుపై దాడి తర్వాత నాని నడుచుకుంటూ వెళ్లిపోయారు. ఆయన చేతులకు, కాళ్లకు ఎలాంటి గాయాలు లేవు. కానీ గాయాలైనట్లు పులివర్తి నాని డ్రామాలు ఆడారు. నాని భార్య సైతం ఇలాగే డ్రామాలు ప్లే చేశారు. నానిపై దాడి విషయంలో అనవసరంగా మాపై ఆరోపణలు చేస్తున్నారు. మమ్మల్ని దోషులను చేస్తున్నారు.ఈ ఐదేళ్లలో నన్ను ఎంత తిట్టినా నేను స్పందించలేదు. నాని దంపతులను ఏనాడూ విమర్శించలేదు. ఐదేళ్లలో వారిపై ఒక్క కేసు కూడా లేదు." అని చెవిరెడ్డి భాస్కర్ రెడ్డి చెప్పుకొచ్చారు.
పులివర్తి నాని డ్రామాల కారణంగా ఎంతో మంది అధికారులు, నేతలు ఇబ్బందులు పడుతున్నారని చెవిరెడ్డి విమర్శించారు. ఐదేళ్లలో నాని క్వారీ వ్యాపారాల జోలికి కూడా తాను వెళ్లలేదన్న చెవిరెడ్డి.. అయినా కూడా నాని భార్య వ్యక్తిగతంగా తమను దూషించారని చెప్పుకొచ్చారు. చంద్రగిరి నియోజకవర్గాన్ని వదిలేద్దామని రెండేళ్ల కిందటే నిర్ణయించుకున్నానని.. కానీ ఇక్కడి ప్రజలతో ఏర్పడిన అనుబంధాన్ని వదులుకోలేకపోయినట్లు చెప్పారు. అందుకే తన కుమారుడిని బరిలో నిలిపానని చెవిరెడ్డి చెప్పారు. నానిపై దాడి చేయాల్సిన అవసరం తమకు లేదని.. పులివర్తి నాని తమకు ప్రత్యర్థే తప్ప.. శత్రువు కాదని చెప్పారు.
మరోవైపు పులివర్తి నానిపై దాడి చేయించింది చెవిరెడ్డి భాస్కర్రెడ్డి, ఆయన కుమారుడు చెవిరెడ్డి మోహిత్ రెడ్డి అని టీడీపీ ఆరోపిస్తున్న సంగతి తెలిసిందే. ఈ నేపథ్యంలో శనివారం చెవిరెడ్డి భాస్కర్ రెడ్డి కొన్ని వీడియో క్లిప్పింగులను విడుదల చేశారు. దాడి జరిగిన సమయంలో పులివర్తి నాని కారు దిగి వెళ్లిపోయినట్టు ఈ వీడియోల్లో కనిపిస్తోంది. అయితే గాయాలు కానప్పటికీ వీల్ ఛైర్లో తిరుగుతూ పులివర్తి నాని డ్రామాలు ఆడుతున్నారని చెవిరెడ్డి ఆరోపిస్తున్నారు.
![]() |
![]() |