రాడ్ తీయించుకునేందుకని ఆస్పత్రికి వెళ్లి.. తిరిగి రాని లోకాలకు

విజయవాడలో ఓ ఇంజినీరింగ్ స్టూడెంట్ మరణం ఆస్పత్రి వద్ద ఉద్రిక్తతలకు దారితీసింది. స్థానికంగా ఉన్న ఓ ప్రైవేట్ ఆస్పత్రిలో చికిత్స పొందుతూ రికిత (19) అనే యువతి చనిపోయింది. కాలులో అమర్చిన రాడ్ తొలగించుకునేందుకు రికిత ఆస్పత్రిలో చేరారు. అయితే రెండు రోజుల క్రితమే శస్త్రచికిత్స పూర్తికాగా.. రిషిత చనిపోయినట్లు శుక్రవారం ఉదయం ఆస్పత్రి వైద్యులు కుటుంబసభ్యులకు సమాచారం ఇచ్చారు. దీంతో ఆస్పత్రి వైద్యుల నిర్లక్ష్యం వలనే రిషిత చనిపోయిందంటూ కుటుంబసభ్యులు ఆస్పత్రి ఎదుట ఆందోళనకు దిగారు.

కుటుంబసభ్యులు చెప్తున్న వివరాల ప్రకారం.. రికిత అనే ప్రస్తుతం బీటెక్ చదువుతున్న అమ్మాయికి ఐదేళ్ల కిందట విజయవాడలోని ఓ ప్రైవేట్ ఆస్పత్రిలో శస్త్రచికిత్స చేశారు. కాలు కాస్త వంకరగా ఉందనే కారణంతో ఆస్పత్రిలో చేరగా.. ఆస్పత్రి వైద్యులు ఆపరేషన్ చేసి రాడ్ అమర్చారు. అప్పటి నుంచి రికిత బాగానే ఉన్నట్లు కుటుంబసభ్యులు చెప్తున్నారు. అయితే రాడ్ తీయించుకునేందుకు గత బుధవారం రికిత ఆస్పత్రిలో చేరారు. రాడ్ తొలగించేందుకు ఆస్పత్రి వైద్యులు మరోసారి ఆపరేషన్ నిర్వహించారు. అయితే ఆపరేషన్ సందర్భంగా ఇచ్చి మత్తు ఇంజెక్షన్ ఓవర్ డోస్ అయ్యి రికిత చనిపోయిందని కుటుంబసభ్యులు ఆరోపిస్తున్నారు. ఆపరేషన్ తర్వాత ఆరోగ్యంగా ఉందని చెప్తూ.. వైద్యులు రెండురోజులు దాటవేశారని ఆరోపిస్తున్నారు. వెంటిలేటర్ మీద ఉందంటూ రెండురోజులు గడిపి.. చివరకు చనిపోయిందంటున్నారని ఆరోపిస్తున్నారు.

ఆస్పత్రిలో చేరే సమయంలో రికిత ఆరోగ్యంగా ఉందంటున్న కుటుంబసభ్యులు.. వైద్యుల నిర్లక్ష్యంతోనే రికిత చనిపోయిందని ఆరోపిస్తున్నారు. ఆస్పత్రి ఎదుట బైఠాయించి ఆందోళనకు దిగారు. మత్తు ఇంజక్షన్ వికటించటమే రికిత మరణానికి కారణమని.. వెంటనే ఆస్పత్రి మీద చర్యలు తీసుకోవాలంటూ డిమాండ్ చేశారు. అనస్తీషియా ఓవర్ డోస్ కారణంగానే రికిత చనిపోయిందని ఆరోపిస్తున్నారు. సమాధానం చెప్పాలని ప్రశ్నిస్తుంటే.. వైద్యులు ఆస్పత్రిలో లేకుండా పోయారని ఆవేదన వ్యక్తం చేశారు. కాలులో ఉన్న రాడ్ తీయించుకునేందుకు వస్తే.. ప్రాణమే తీశారంటూ భోరున విలపిస్తున్నారు.