ఏపీలో బీఆర్ఎస్ పోటీ..? బీఫామ్ కోసం కేసీఆర్ వద్దకు లీడర్

తెలంగాణ అసెంబ్లీ ఎన్నికల్లో ఓటమిపాలైన భారతీయ రాష్ట్ర సమితి (బీఆర్ఎస్) పేరు ఇప్పుడు ఏపీలోనూ వినిపిస్తోంది. తెలంగాణ అసెంబ్లీ ఎన్నికల్లో ఊహించని ఓటమి తర్వాత డీలాపడిపోయిన బీఆర్ఎస్.. పార్లమెంట్ ఎన్నికల్లో ఎలాగైనా సత్తాచాటాలని బలంగా ప్రయత్నిస్తోంది. కారు పార్టీ మనుగడ కొనసాగించాలన్నా.. నేతల వలసలకు అడ్డుకట్ట పడాలన్నా తెలంగాణ పార్లమెంట్ ఎన్నికల్లో గులాబీ పార్టీ మెజారిటీ స్థానాలు గెలవాల్సిన పరిస్థితి. తెలంగాణలో పరిస్థి్తి అలా ఉంటే.. ఇప్పుడు ఏపీలోనూ ఆ పార్టీ తరుఫున పోటీ చేస్తామని నేతలు ముందుకొస్తున్నారు.

తెలంగాణలో అధికారంలో ఉన్న సమయంలో గులాబీపార్టీని జాతీయ పార్టీ మార్చే ప్రయత్నం చేశారు కేసీఆర్. అందులో భాగంగా తెలంగాణ రాష్ట్ర సమితి పేరును భారతీయ రాష్ట్ర సమితిగా మార్చారు. మహారాష్ట్ర, ఆంధ్రప్రదేశ్ సహా పొరుగు రాష్ట్రాలకు తమ పార్టీని విస్తరించారు. ఈ క్రమంలోనే ఏపీ బీఆర్ఎస్ అధ్యక్షుడిగా తోట చంద్రశేఖర్‌ను నియమించారు. అయితే తెలంగాణ అసెంబ్లీ ఎన్నికల్లో ఓటమి తర్వాత.. గులాబీ పార్టీ సొంతింటిని చక్కదిద్దుకునే పనిలో పడింది. దీంతో ఏపీలో ఎన్నికలు జరుగుతున్నా కూడా ఆ పార్టీని పట్టించుకునే నాథుడే లేడు. చివరకు పార్టీ అధ్యక్షుడు తోట చంద్రశేఖర్ కూడా ఎక్కడున్నారో తెలియని స్థితి.

ఈ నేపథ్యంలోనే ఏపీ ఎన్నికల్లో బీఆర్ఎస్ తరుఫున పోటీ చేసేందుకు ఓ లీడర్ ముందుకొచ్చారు. ఏపీ బీఆర్ఎస్ నేత కొణిజేటి ఆదినారాయణ.. విజయవాడ సెంట్రల్ నియోజకవర్గం నుంచి స్వతంత్ర అభ్యర్థిగా నామినేషన్ దాఖలు చేశారు. బీఫామ్ ఇవ్వటానికి ఏపీ బీఆర్ఎస్ అధ్యక్షుడు తోట చంద్రశేఖర్ అందుబాటులో లేకుండా పోయారన్న ఆదినారాయణ.. బీ ఫారమ్ కోసం అడుగుతున్నా పట్టించుకోవడం లేదని అన్నారు. అందుకే కేసీఆర్‌ను కలిసి బీ ఫామ్ అడగాలని నిర్ణయించుకున్నట్లు చెప్పారు. కేసీఆర్ బీఫామ్ ఇవ్వకపోతే స్వతంత్ర అభ్యర్థిగా బరిలో ఉంటానని చెప్తున్నారు.

తెలంగాణ ఎన్నికల తర్వాత అందరూ కేసీఆర్ పనైపోయిందని అంటున్నారని.. కానీ ఏపీలో కేసీఆర్ క్రేజ్ అలాగే ఉందని ఆదినారాయణ చెప్పారు. అప్పుల ఊబిలో ఉన్న రాష్ట్రాన్ని గట్టెక్కించాలంటే కేసీఆర్ తప్పనిసరి అని చెప్పుకొచ్చారు. కేసీఆర్ బీఫామ్ అందించి ఏపీలో బీఆర్ఎస్ పార్టీ పోటీకి అంగీకరిస్తే.. మెరుగైన స్థానంలో నిలబెడతామని అన్నారు. గెలిచి కేసీఆర్‌కు గిఫ్టుగా ఇస్తామని తెలిపారు. హైదరాబాద్‍‌లో ఆంధ్రాప్రజలు ఉన్నచోట బీఆర్ఎస్‌కు మెజారిటీ ఉన్న విషయాన్ని గుర్తు చేశారు.అలాగే పోటీకి అంగీకరిస్తే కేటీఆర్‌ను ప్రచారానికి తీసుకువస్తానని చెప్పారు.