ట్రెండింగ్
Epaper    English    தமிழ்

ఏపీ సచివాలయ ఉద్యోగుల సంఘం అధ్యక్షుడు వెంకట్రామిరెడ్డి సస్పెండ్

Andhra Pradesh Telugu |  Suryaa Desk  | Published : Fri, Apr 19, 2024, 08:50 PM

ఆంధ్రప్రదేశ్‌లో మరో ప్రభుత్వ అధికారిపై వేటు పడింది. రాష్ట్ర సచివాలయ ఉద్యోగుల సంఘం అధ్యక్షుడు వెంకట్రామిరెడ్డిని ఎన్నికల కమిషన్‌ ఆదేశాలతో సస్పెండ్‌ చేస్తూ ప్రభుత్వం ఉత్తర్వులు జారీచేసింది. సస్పెన్షన్‌ కాలంలో ప్రధాన కార్యాలయం విడిచి వెళ్లరాదని హెచ్చరించింది. ప్రస్తుతం రాష్ట్ర సచివాలయంలోని పంచాయతీరాజ్‌, గ్రామీణాభివృద్ధి విభాగంలో సహాయ కార్యదర్శిగా పనిచేస్తున్న ఈయన సచివాలయ ఉద్యోగుల సంఘం అధ్యక్షుడి పదవితో పాటు రాష్ట్ర ప్రభుత్వ ఉద్యోగుల సమాఖ్యకు ఛైర్మన్‌గా వ్యవహరిస్తున్నారు.


వెంకట్రామిరెడ్డి వైఎస్సార్‌సీపీకి అనుకూలంగా వ్యవహరించారనే ఆరోపణలున్నాయి. ఎన్నికల కోడ్‌కు ముందు, కోడ్‌ సమయంలోనూ అధికార పార్టీకి అనుకూలంగా ప్రచారం చేశారని ఫిర్యాదులు అందాయి. ఉమ్మడి కడప జిల్లాలో మార్చి 31న ప్రజారవాణా శాఖ (పీటీడీ) వైఎస్‌ఆర్‌ ఉద్యోగుల సంఘం రాష్ట్ర అధ్యక్షుడు చల్లా చంద్రయ్య, మరికొందరితో కలిసి వైఎస్సార్‌సీపీకి ఓట్లు వేయాలని బద్వేలు, మైదుకూరు, ప్రొద్దుటూరు, కడప ఆర్టీసీ డిపోల్లో ప్రచారం చేశారని ఫిర్యాదులు చేశారు. వైఎస్సార్‌సీపీ అనుకూలంగా కరపత్రాలు పంచారని.. మీడియాలో కథనాలు వచ్చాయి.


అయితే ఈ వ్యవహారంలో పీటీడీకి చెందిన చల్లా చంద్రయ్యతో పాటు 10 మందిని వెంటనే సస్పెండ్‌ చేశారు. వెంకట్రామిరెడ్డిపై చర్యలు తీసుకోవాలని సీఈవోకు టీడీపీ ఫిర్యాదు చేసింది. ఎన్నికల కోడ్‌ సమయంలో ఆర్టీసీ డిపోల్లో ప్రచారం చేసిన వెంకట్రామిరెడ్డిపై చర్యలు తీసుకోవాలని కడప‌ జిల్లా ఎన్నికల అధికారి, కలెక్టర్‌ సైతం ప్రభుత్వానికి సిఫార్సు చేశారు. దీంతో ప్రభుత్వం స్పందించి, వెంకట్రామిరెడ్డిని సస్పెండ్‌ చేసింది. వెంకట్రామిరెడ్డి ఎన్నికల కోడ్‌కు ముందు ‘మన ప్రభుత్వం- మన ప్రగతి’ కార్యక్రమాన్ని నిర్వహించారు. ప్రభుత్వంలో ఆర్టీసీని విలీనం చేయడంతో మేలు జరిగిందంటూ ప్రచారం చేశారు.






SURYAA NEWS, synonym with professional journalism, started basically to serve the Telugu language readers. And apart from that we have our own e-portal domains viz,. https://www.suryaa.com/ and https://epaper.suryaa.com