షాలీమార్ సూపర్ ఫాస్ట్ ఎక్స్‌ప్రెస్‌లో ప్రయాణికులు ఉక్కిరిబిక్కిరి.. 5 గంటలకుపైగా నరకం

షాలిమార్‌ నుంచి సికింద్రాబాద్‌ వెళ్లే వీకెండ్ సూపర్‌ఫాస్ట్‌ ఎక్స్‌ప్రెస్‌ (22849) రైలులో ప్రయాణికులు ఇబ్బందిపడ్డారు. సాంకేతిక సమస్యతో ఈ రైలును నిలిపివేశారు. సమస్యను పరిష్కరిస్తామని రైలును ఏకంగా 5 గంటలకుపైగా నిలిపివేయడంతో ప్రయాణికులు బోగీల్లో కూర్చోలేక ఇబ్బందిపడ్డారు. చివరికి ఆందోళన చేసి, రైల్వే సిబ్బందిని నిలదీస్తే తాత్కాలిక మరమ్మతులు చేసి రైలును పంపించారు. సూపర్ ఫాస్ట్ ఎక్స్‌ప్రెస్ 19 కోచ్‌లతో షాలిమార్‌ నుంచి బయలుదేరి ఉదయం 7.33 గంటలకు రాజమహేంద్రవరం వచ్చింది.

ఈ రైలులో 12 ఏసీ కోచ్‌లే ఉన్నాయి. రైలు బయలుదేరినప్పటి నుంచే కొన్ని బోగీల్లో విద్యుత్తు సమస్య మొదలైంది. కొందరు ప్రయాణికులు ఫిర్యాదు చేయగా.. రాజమహేంద్రవరం వచ్చేసరికి బోగీల్లో ఏసీలు, ఫ్యాన్‌లు, లైట్లు పనిచేయకపోవడం, టాయిలెట్లలో నీరూ రాకపోవడంతో ప్రయాణికులు ఇబ్బందిపడ్డారు. ఈ సమస్యను గమనించిన సిబ్బంది కడియం దగ్గర రైలును ఆపిం మరమ్మతులు చేసే ప్రయత్నం చేశారు. కానీ సమస్య పరిష్కారం కాకపోవడంతో రైలును అలాగే పంపి.. రాజమహేంద్రవరం రైల్వేస్టేషన్‌ చేరుకున్నాక నిలిపివేశారు.

ఈ రైలు ఇంజిన్ వెనుకున్న జనరేటర్‌ పవర్‌ కార్‌లో సాంకేతిక సమస్య వచ్చిందని సిబ్బంది మరమ్మతులు చేశారు. ఎంతసేపైనా మరమ్మతులు పూర్తికాకపోవడంతో బోగీల్లోని ప్రయాణికులు ఉక్కపోతతో ఉక్కిరిబిక్కిరయ్యారు. బోగీల్లో ఏసీలు, ఫ్యాన్లు, లైట్లు పనిచేయకపోవడం, చివరికి టాయిలెట్లలో నీరూ రాకపోవడంతో పిల్లలు, వృద్ధులు ఇబ్బందిపడ్డారు. గాలి ఆడకపోవడంతో చిన్న పిల్లలు అవస్థలు పడ్డారు. సెల్‌ఫోన్లలో చార్జింగ్‌ అయిపోవడంతో ప్లాట్‌ఫాంపై ఉన్న సాకెట్లలో చార్జింగ్‌ పెట్టుకొన్నారు.

రైలులోని ప్యాంట్రీ కార్‌ (వంట బోగీ)లో కూడా విద్యుత్‌ నిలిచిపోవడంతో టీ తయారు చేయడానికి కూడా వీలు లేకుండా పోయింది. రాజమహేంద్రవరం స్టేషన్‌లోనే 5:30 గంటలపాటు రైలు ఆపేయడంతో ప్రయాణికులు స్టేషన్‌ మాస్టర్‌‌ను కలిసి ఆందోళనకు దిగారు. రైలు ఎప్పుడు బయల్దేరుతుందని వాగ్వాదానికి దిగారు. . చివరికి తాత్కాలికంగా సమస్యను పరిష్కరించడంతో మధ్యాహ్నం ఒంటి గంటకు రైలు సికింద్రాబాద్‌కు బయలుదేరింది.