టికెట్ వచ్చిన ఆనందంలో టీడీపీ ఎమ్మెల్యే వెలగపూడి.. ఇంతలోనే ఫోన్ చేసి చంపేస్తామని బెదిరింపులు

విశాఖ తూర్పు ఎమ్మెల్యే, టీడీపీ నేత వెలగపూడి రామకృష్ణబాబు పోలీసులను ఆశ్రయించారు. కొంతమంది వ్యక్తులు తనకు ఫోన్ చేసి చంపేస్తామని బెదిరిస్తున్నారని పోలీసులకు ఫిర్యాదు చేశారు. శనివారం రాత్రి ఎనిమిదిన్నర గంటలకు కొంతమంది గుర్తు తెలియని వ్యక్తులు ఇంటర్నేషనల్ కాల్స్‌ ద్వారా ఫోన్‌ చేసినట్లు రామకృష్ణబాబు తెలిపారు. ఫోన్‌ చేసి దుర్భాషలాడారని. చంపేస్తామని బెదిరించారని స్థానిక పోలీస్ స్టేషన్‌లో పోలీసులకు ఫిర్యాదు చేశారు. ఫోన్ కాల్స్ వివరాలను సైతం పోలీసులకు సమర్పించారు. నిందితులపై కఠినచర్యలు తీసుకోవడంతో పాటు, తనకు రక్షణ కల్పించాలని వెలగపూడి రామకృష్ణబాబు కోరారు.

మరోవైపు టీడీపీ, జనసేన ఉమ్మడి అభ్యర్థుల జాబితాలో వెలగపూడి రామకృష్ణబాబుకు చోటు దక్కింది. శనివారం టీడీపీ అధినేత చంద్రబాబు నాయుడు, జనసేన అధినేత పవన్ కళ్యాణ్ 99 మందితో లిస్టు విడుదల చేశారు. ఈ లిస్టులో విశాఖపట్నం తూర్పు నుంచి మరోసారి వెలగపూడి రామకృష్ణబాబునే అభ్యర్థిగా బరిలోకి దింపుతూ తెలుగుదేశం పార్టీ నిర్ణయం తీసుకుంది. అయితే లిస్టు విడుదలైన రోజు రాత్రి నుంచే ఆయన బెదిరింపు ఫోన్ కాల్స్ రావటం ప్రాధాన్యం సంతరించుకుంది. దీంతో టికెట్ దక్కిందన్న ఆనందంలో ఉన్న వెలగపూడికి.. ఈ హెచ్చరికలు కలవరపెడుతున్నాయి.

ఆదివారం ఉదయం ఇంటర్నేషనల్ నెంబర్లతో వెలగపూడి రామకృష్ణ బాబుకు ఫోన్ చేసిన ఆగంతకులు.. దుర్భాషలాడుతూ చంపేస్తామని బెదిరించినట్లు తెలిసింది. ఈ నేపథ్యంలో విశాఖ పోలీసులను ఆశ్రయించిన వెలగపూడి.. ఆగంతకులను గుర్తించి కఠినంగా శిక్షించాలని కోరారు. అయితే ఇదంతా వైసీపీ పనేనంటున్నాయి టీడీపీ శ్రేణులు. అధికార పార్టీ నేతల నుంచే వెలగపూడికి బెదిరింపులు కాల్స్ వస్తున్నాయని టీడీపీ శ్రేణులు ఆరోపిస్తున్నాయి. 2019 ఎన్నికల్లో జగన్ హవాలో కూడా వెలగపూడి రామకృష్ణబాబు గెలిచారని.. ఇప్పుడు మరోసారి గెలుస్తారనే భయంతోనే ఇలాంటి చర్యలకు పాల్పడుతున్నారని టీడీపీ శ్రేణులు ఆరోపిస్తున్నాయి. మరోవైపు విశాఖ తూర్పు నుంచి ఇప్పటికి మూడు సార్లు గెలిచిన వెలగపూడి.. నాలుగోసారి అక్కడి నుంచేబరిలోకి దిగుతున్నారు. విశాఖ తూర్పు నియోజకవర్గం నుంచి వెలగపూడి రామకృష్ణబాబు.. తొలిసారి 2009లో టీడీపీ తరుఫున గెలుపొందారు. ఆ తర్వాత 2014, 2019 ఎన్నికల్లోనూ వరుసగా గెలిచి హ్యాట్రిక్ కొట్టారు. ఇప్పుడు నాలుగోసారి అక్కడి నుంచే బరిలోకి దిగుతున్నారు.