భార్య చైన్‌ను మింగేసిన భర్త,,,ఆపరేషన్ చేయకుండా బయటకు తీసిన డాక్టర్లు

భార్య లాంగ్ చైన్‌ను భర్త మింగేశాడు. ఈ వింత ఘటన  శ్రీ సత్యసాయి జిల్లా ధర్మవరంలో చోటుచేసుకుంది. దీంతో మూడు నెలలుగా భర్త కడుపులోనే లాంగ్ చైన్ ఉండగా.. తాజాగా డాక్టర్లు బయటకు తీశారు. ఎలాంటి సర్జరీ చేయకుండానే లాంగ్ చైన్‌ను బయటకు తీశారు. దీంతో బాధితుడు ఊపిరిపీల్చుకున్నాడు. ఈ సంఘటనకు సంబంధించిన పూర్తి వివరాల్లోకి వెళితే..

ధర్మవరం పట్టణం రాజేంద్రనగర్‌కు చెందిన రామాంజనేయులు గత కొన్ని రోజులుగా తీవ్ర అస్వస్థతతో బాధపడుతున్నాడు. చివరకు గొంతు పోయి మాట్లాడలేని పరిస్థితికి చేరుకున్నాడు. దీంతో ఏమైందో అర్థం కాక కుటుంబసభ్యులు చికిత్స కోసం ఆస్పత్రిలో చేర్పించారు. బత్తలపల్లి ఆర్డిటి ఆసుపత్రి డాక్టర్లు పరీక్షలు నిర్వహించగా.. బాధితుడి శరీరంలో లాంగ్ చైన్ ఉన్నట్లు స్కానింగ్‌లో బయటపడింది. ఇది చూసి ఆసుపత్రి వైద్యులు ఒక్కసారిగా షాక్‌కు గురయ్యారు. ఆపరేషన్ చేసి బంగారం చైన్ తీయాలని, ఇందుకుగాను డబ్బులు అవుతాయని ఆర్డిటి హాస్పిటల్ డాక్టర్లు చెప్పారు. అయితే ఆపరేషన్ కోసం డబ్బులు పెట్టుకునే స్థోమత లేక బాధితుడు అనంతపురంలోని ప్రభుత్వ ఆస్పత్రికి వెళ్లాడు.

చైన్ బయటకు తీశారు. కేవలం నోటి ద్వారానే డాక్టర్ సుకుమార్ చైన్ బయటకు తీశారు. వైద్యుల చొరవకు బాధితుడి కుటుంబం కృతజ్ఞతలు తెలిపింది. ఎట్టకేలకు చైన్ బయటకు రావడంతో బాధితుడు, కుటుంబసభ్యులు ఊపిరిపీల్చుకున్నారు. ప్రస్తుతం బాధితుడు ఆస్పత్రిలోనే ఉన్నాడు. ఆరోగ్యం బాగానే ఉందని, ఎలాంటి ఇబ్బంది లేదని డాక్టర్లు తెలిపారు. త్వరలోనే డిశ్చార్జ్ చేస్తామని అన్నారు. ఎలాంటి ఖర్చు కాకపోవడం, బాధితుడు కోలుకోవడంతో కుటుంబసభ్యులు ఆనందం వ్యక్తం చేస్తున్నారు.