తెలంగాణ రాష్ట్ర మంత్రి గంగుల కమలాకర్ వ్యాఖ్యలు ఆయన అహంకారానికి నిదర్శనమని ఏపీ మంత్రి చెల్లుబోయిన వేణుగోపాలకృష్ణ పేర్కొన్నారు. ఇదిలా ఉంటే గత కొన్నిరోజులుగా టీఆర్ఎస్, వైసీపీ నేతల మధ్య మాటల యుద్ధం కొనసాగుతున్న సంగతి తెలిసిందే. తమ వైఫల్యాలను కప్పిపుచ్చుకునేందుకే ఏపీ మంత్రులు బొత్స, అమర్నాథ్, ప్రభుత్వ సలహాదారు సజ్జల తమపై వ్యాఖ్యలు చేస్తున్నారని తెలంగాణ మంత్రి గంగుల కమలాకర్ నిన్న మండిపడ్డారు. తెలంగాణ విషయాల్లో తలదూర్చితే బాగుండదని, పచ్చని తెలంగాణలో చిచ్చుపెట్టొద్దని వైసీపీ నేతలను హెచ్చరించారు.
దీనిపై ఏపీ మంత్రి చెల్లుబోయిన వేణుగోపాలకృష్ణ స్పందించారు. మంత్రి గంగుల కమలాకర్ వ్యాఖ్యలు ఆయన అహంకారానికి నిదర్శనం అని విమర్శించారు. రాజకీయాల్లో ఇష్టంవచ్చినట్టు మాట్లాడడం సరికాదని హితవు పలికారు. ఏపీ ఉద్యోగుల విషయంలో తెలంగాణ మంత్రి హరీశ్ రావు చేసిన వ్యాఖ్యలపైనే సజ్జల స్పందించారని స్పష్టం చేశారు. మాతో పెట్టుకుంటే ఏమైనా చేస్తాం అన్న వ్యాఖ్యలను మంత్రి గంగుల ఉపసంహరించుకోవాలని వేణుగోపాలకృష్ణ డిమాండ్ చేశారు.