మహిళ ఫోన్ నెంబర్ ను డేటింగ్ సైట్ లో పెట్టిన ఆకతాయి అరెస్ట్
Andhra Pradesh Telugu | Suryaa Desk | Published : Wed, Sep 16, 2020, 07:09 PM
ముల్లుని ముల్లుతోనే తీయాలంటారు పెద్దలు. సరిగ్గా అదే ఉపాయంతో మహిళని వేధిస్తున్న యువకుడిని కటకటాల వెనక్కి నెట్టించారు ఆమె కుటుంబ సభ్యులు. ఈ ఘటన తమిళనాడులో చోటుచేసుకుందని టీఓఐ కథనం పేర్కొంది. వివరాల్లోకి వెళ్తే... చెన్నైకి చెందిన మహిళ కేక్ ఆర్డర్ చేసేందుకు ఓ బేకరీకి వెళ్లింది. అనంతరం డెలివరీ కోసం తన ఫోన్ నంబర్ ఇచ్చింది. ఆమె ఫోన్ నంబర్ తీసుకున్న బేకరీ బాయ్ అరాచకానికి పాల్పడ్డాడు. ఆమె ఫోన్ నంబర్‌ని డేటింగ్ సైట్‌లో పెట్టాడు. అప్పటి నుంచి ఆమెకు కాల్‌గర్ల్ అంటూ అసభ్యకర ఫోన్ కాల్స్ రావడం మొదలైంది. నీచపు మాటలు భరించలేకపోయిన ఆమె తన భర్తతో కలసి పోలీసులను ఆశ్రయించింది.ఓ డేటింగ్ యాప్‌లో ప్రొఫైల్ క్రియేట్ చేసి తన ఫోన్ నంబర్ అప్‌లోడ్ చేసినట్లు గుర్తించిన కుటుంబ సభ్యులు పోలీసులు సహకారంతో రివర్స్ ప్లాన్‌ వేశారు. మరో ఫేక్ ప్రొఫైల్ క్రియేట్ చేసి ఆమె ఫోన్ నంబర్ ఉన్న ప్రొఫైల్‌కి రెచ్చగొట్టేలా మెసేజ్‌లు పంపించారు. అది తెలియని నిందితుడు వారికి రిప్లై ఇచ్చి అడ్డంగా దొరికిపోయాడు. నిందితుడిని విల్లుపురానికి చెందిన డి.వెంకటేష్(19)గా గుర్తించారు. అతను బేకరీలో పనిచేసేవాడని.. సదరు మహిళ కేక్ ఆర్డర్ చేసినప్పుడు ఆమె ఫోన్ నంబర్ తెలుసుకుని అశ్లీల వెబ్‌సైట్స్‌లో అప్‌లోడ్ చేసినట్లు తేల్చారు.
|
|