మహిళల కోసం సింధు దివా సేవింగ్స్ అకౌంట్

పెద్ద పెద్ద బ్యాంకుల నుంచి చిన్న చిన్న బ్యాంకుల వరకూ మహిళలను ఆకట్టుకునేందుకు సేవింగ్ అకౌంట్‌‌ను అందిస్తున్నాయి. ఆ ఖాతాల ద్వారా రాయితీలు, సబ్సిడీలు, డిస్కౌంట్లు అందిస్తున్నాయి.బ్యాంకులు మహిళలపై వరాలు జల్లు కురిపిస్తున్నాయి. అదిరిపోయే ఆఫర్లతో ఆకట్టుకుంటున్నాయి. స్పెషల్‌గా ఆడవాళ్ల కోసమే కొన్ని సేవింగ్స్ ఖాతాలను డిజైన్ చేస్తున్నాయి. అలా ఇండస్ ఇండ్ బ్యాంక్ కూడా ప్రత్యేకంగా లేడీస్‌ కోసం ఓ సేవింగ్స్ ఖాతాను ప్రవేశ పెట్టింది. అదే సింధు దివా సేవింగ్స్ అకౌంట్.ఈ తరం మహిళల బ్యాంకింగ్ అవసరాలను దృష్టిలో ఉంచుకుని సింధు దివా సేవింగ్స్ అకౌంట్‌ను రూపొందించడం జరిగింది. మహిళలు ఆశించే డబ్బు పొదుపుతో పాటు మరికొన్ని సౌకర్యాలు ఈ ఖాతాతో లభిస్తాయి.ఈ ఖాతాను తెరవడానికి అభ్యర్థి కచ్చితంగా భారత దేశ నివాసి అయి ఉండాలి. ఒక వేళ ఉమ్మడి ఖాతా తీసుకోవాలనుకుంటే మొదటి దరఖాస్తుదారురాలు మహిళ అయి ఉండాలి. ఈ ఖాతా కోసం ఆన్‌లైన్‌లో అప్లై చేసుకోవచ్చు. దీనికోసం బ్యాంక్ వెబ్‌సైట్‌లోకి వెళ్లి పూర్తి వివరాలను నమోదు చేయాలి. అలాగే నేరుగా బ్యాంక్‌ దగ్గరకి వెళ్లి అకౌంట్‌ను తెరుచుకోవచ్చు. అకౌంట్ తెరిచేందుకు పూర్తిగా నింపిన అప్లికేషన్‌తో పాటు అడ్రస్ ప్రూఫ్, డ్రైవింగ్ లైసెన్స్, ఓటర్ ఐడీ, అభ్యర్థి ఫొటో, పాన్ కార్డ్ జెరాక్స్ కాపీలను అందజేయాలి. అలాగే రూ.25000 డిపాజిట్‌గా కట్టాల్సి ఉంటుంది. యాడ్-ఆన్ ఖాతాలకు ప్రారంభ డిపాజిట్‌గా రూ .2,000 లేదా అంతకంటే ఎక్కువ అందజేయాలి.ఈ ఖాతాదారులకు ప్రత్యేకంగా రూపొందించిన ప్లాటినం ప్లస్ డెబిట్ కార్డ్‌ను ఇవ్వడం జరుగుతుంది. నగదు రహిత చెల్లింపులకు ఈ కార్డ్ చాలా ఉపయోగపడుతుంది.కార్డు మొదటి ఏడాది ఫీజులో 50 శాతం తగ్గింపు లభిస్తుంది. అదేవిధంగా డిస్కౌంట్‌‌‌తో లాకర్ సర్వీస్‌ను పొందవచ్చు. సేఫ్ డిపాజిట్ లాకర్‌ సదుపాయంపై మొదటి సంవత్సరం ఫీజుపై 25 శాతం తగ్గింపు లభిస్తుంది. సింధు దివా సేవింగ్స్ ఖాతాదారులకు ఈ ఖాతాతో పాటు రెండు అదనపు ఖాతాలను ఉచితంగా తెరవడానికి ఇండస్ఇండ్ బ్యాంక్ అనుమతిస్తుంది. కుటుంబ సభ్యుల కోసం యాడ్-ఆన్ ఖాతాలను తెరవవచ్చు. ఈ ఖాతా తీసుకున్నవారు దేశంలో ఎక్కడైనా ఖాతాను యాక్సెస్ చేసుకోవచ్చు. ఎటువంటి అదనపు ఛార్జీలు ఉండవు.అదే విధంగా ఇంటి నుంచే సులభంగా లావాదేవీలను నిర్వహించుకునేందుకు మొబైల్, నెట్ బ్యాంకింగ్ సౌకర్యం కూడా ఉంది. ఈ-స్టేట్‌మెంట్‌లను డౌన్‌లోడ్ చేసుకోవచ్చు, డీడీ కోసం అభ్యర్థించవచ్చు. అంతే కాదు ఇండస్ ఇండ్ బ్యాంక్ డోర్ స్టెప్ బ్యాంకింగ్‌ను కూడా అందిస్తుంది.ఉద్యోగం చేసే చాలామంది మహిళలకు ఇలాంటి ఓ సేవింగ్స్ అకౌంట్ ఉన్నట్టు తెలియదు. ఇన్ని లాభాలుండే సేవింగ్స్ అకౌంట్లు మహిళలకు ఎంతో అవసరం. ఈ విషయం అందరికీ తెలిసేలా షేర్ చేయండి.