ఇంజినీరింగ్‌ విద్యార్థులకు ఐటీ కోర్సుల్లో శిక్షణ..
Andhra Pradesh Telugu | Suryaa Desk | Published : Fri, Sep 11, 2020, 02:26 PM
ఏపీలో ఇంజనీరింగ్ విద్యార్థులకు శిక్షణ ఇచ్చి నైపుణ్యాలను పెంపొందించేందుకు ప్రముఖ రోబోటిక్ ప్రాసెస్ ఆటోమేషన్ (ఆర్‌పీఏ) సాఫ్ట్‌వేర్ కంపెనీ.. యుఐ పాత్, స్కిల్ డెవలప్‌మెంట్ కార్పొరేషన్ మధ్య ఎంవోయూ కుదిరింది. ఏడాది వ్యవధిలో 50 వేల మంది ఇంజనీరింగ్ విద్యార్థులకు శిక్షణ ఇచ్చి పరిశ్రమల అవసరాలకు అనుగుణంగా తీర్చిదిద్దనున్నట్లు స్కిల్ డెవలప్‌మెంట్ కార్పొరేషన్ చైర్మన్ చల్లా మధుసూదనరెడ్డి తెలిపారు.జాబ్‌ మార్కెట్‌లో డిమాండ్ ఉన్న కోర్సుల్లో ఇంజనీరింగ్ మూడో ఏడాది విద్యార్థులకు శిక్షణ ఇచ్చి నైపుణ్యాలను మెరుగుపరుస్తామని పేర్కొన్నారు. ప్రాథమిక స్ధాయిలోనే ఆర్‌పీఏ విద్యను అందుబాటులోకి తేవడం ద్వారా డిజిటల్ వర్క్‌ఫోర్స్ నిర్మాణం ఆరంభమవుతుందన్నారు.అధ్యాపకులు, విద్యార్థులు 50 శాతం రాయితీతో యుఐ పాత్ సర్టిఫైడ్ గ్లోబల్ సర్టిఫికెట్లు పొందవచ్చని సంస్ధ ఇండియా చైర్మన్ భారతి తెలిపారు. నూతన ఆటోమేషన్ యుగానికి అవసరమైన నైపుణ్యాలను సమకూర్చడం, ఐటీలో అత్యంత వేగంగా అభివృద్ధి చెందుతున్న రంగాల్లో కెరీర్ నిర్మాణం లక్ష్యంతో పని చేస్తున్నట్లు వివరించారు. దేశవ్యాప్తంగా 200కిపైగా స్కిల్ డెవలప్‌మెంట్ సంస్థలతో భాగస్వామ్యం కుదుర్చుకున్నామని, తెలంగాణ సహా పలు రాష్ట్రాల్లో లక్ష మందికిపైగా విద్యార్థులకు శిక్షణ ఇస్తున్నట్లు తెలిపారు.ఆసక్తి గల అభ్యర్థులు యూఐ పాత్ సర్టిఫైడ్ కోర్సుల గురించి మరింత సమాచారం కోసం bit.ly/32cS3Pk, bit.ly/3m6CMr6 వెబ్‌సైట్ ద్వారా తెలుసుకోవచ్చు.
|
|