ఈ నెంబర్స్ నుండి కాల్స్ వద్దు!

లైంగిక వేధింపులు మహిళలకు ఎక్కడైనా ఎదురుకావొచ్చు. ఒకే చోట పనిచేస్తున్న ఆడవాళ్లు, మగవాళ్ల మధ్య స్నేహపూర్వక బంధాలు ఏర్పడటం సాధారణం. ఈ క్రమంలో వాళ్ల మధ్య జరిగే సంభాషణలు శ్రుతి మించే అవకాశమూ ఉంటుంది. మహిళల ఫోన్ నెంబరు ఏదోవిధంగా సేకరించి వారికి వీడియో కాల్ చేసి, ఇతర పద్ధతుల్లో వారిని మానసికంగా వేధిస్తున్నారు. ఈ నేపథ్యంలో వాట్స్ అప్ వాడే ప్రతీ మహిళా తీసుకోవలసిన కొన్ని అతి ముఖ్యమైన జాగ్రత్తలు ఇప్పుడు చూద్దాం.

వీడియో కాల్స్:అపరిచితమైన నెంబర్ల నుండి వీడియో కాల్ వస్తుంటే మహిళలు ఎట్టి పరిస్థితుల్లో వాటిని లిప్ట్ చేయకండి. కాల్ డిస్కనెక్ట్ చేసి సంబంధిత వ్యక్తి తెలిసిన వ్యక్తా కాదా అన్నది ట్రూకాలర్ ద్వారా, ఇతర పద్ధతుల్లో నిర్ధారణ చేసుకొని అనుమానాస్పదంగా ఉంటే వెంటనే బ్లాక్ చేయండి. ఒకవేళ తప్పనిసరి పరిస్థితుల్లో వీడియో కాల్ ఎత్తినట్లయితే మీరు కనిపించకుండా సెల్ఫీ కెమెరా మీద వేలిని అడ్డుగా పెట్టి అవతలి వ్యక్తి ఎవరో వీడియో లో చూసి నిర్ధారణ చేసుకున్న తర్వాత మాత్రమే, తెలిసిన వాళ్ళు అయితే అప్పుడు కెమెరా మీద నుండి వేలు తీయడం మంచిది.

ఈ నెంబర్స్ నుండి కాల్స్ వద్దు!+91 అనేది భారతదేశానికి సంబంధించిన కోడ్. మీకు వచ్చే ఫోన్ కాల్స్ +91 అని మొదట్లో వస్తే వర్రీ అవ్వాల్సిన పనిలేదు. అయితే +91 కాకుండా ఇతర నెంబర్ల దేశాల కోడ్‌తో ఫోన్ కాల్స్ వచ్చినప్పుడు ఎట్టి పరిస్థితుల్లో అటెండ్ చేయకండి. సంబంధిత దేశాల్లో మీకు స్నేహితులు గానీ, బంధువులు గాని ఉన్నప్పుడు మాత్రమే అలాంటి కోడ్స్ నుండి వచ్చినప్పుడు కాల్ అటెండ్ చేయొచ్చు గానీ, అధికశాతం సందర్భాలలో విదేశాల నుండి స్పామ్ కాల్స్ వస్తుంటాయి.

మీ ప్రొఫైల్ పిక్చర్, స్టేటస్:

మీరు వాట్స్ అప్ లో సెట్ చేసుకున్న ప్రొఫైల్ పిక్చర్, స్టేటస్ మెసేజ్ కేవలం మీ కాంటాక్ట్ లిస్ట్ లో ఉన్నవారు మాత్రమే చూడగలిగే విధంగా పరిమితి విధించుకోండి. కొంతమంది తెలిసి తెలియక ప్రొఫైల్ పిక్చర్ మరియు స్టేటస్ అందరికీ కనిపించే విధంగా ఏర్పాటు చేసుకుంటారు. అలాంటి సందర్భంలో సైబర్ నేరస్తులు వాటిని డౌన్లోడ్ చేసుకొని మార్ఫింగ్, ఇతర వేధింపులకి పాల్పడే ప్రమాదం ఉంటుంది.

వా గ్రూపుల్లో జత చెయ్యకుండా!

ఎవరు పడితే వాళ్ళు మిమ్మలను బలవంతంగా రకరకాల వాట్స్ అప్ గ్రూప్ లోకి జాయిన్ చెయ్యకుండా సెట్టింగ్స్ చేసుకోండి. మీరు ఎక్కువ వాట్స్ అప్ గ్రూప్ గ్రూపుల్లో సభ్యులుగా ఉన్న కొద్ది మీ కాంటాక్ట్స్ అపరిచితులకి తెలిసే ప్రమాదం ఎక్కువ ఉంటుంది.