వైరస్ లు కూడా మంచి చేస్తాయట: పరిశోధనలో వెల్లడి
Andhra Pradesh Telugu | Suryaa Desk | Published : Wed, Sep 09, 2020, 08:01 PM
వైరస్ అనే పేరు వినబడితే చాలు ప్రపంచం అంతా భయంతో వణికిపోతుంది. ఇప్పటికే కరోనా మహమ్మారితో ప్రపంచం అతలాకుతలం అవుతుంది. కరోనా వైరస్ నుంచి ఎలా రక్షించుకోవాలని అన్ని దేశాలు ప్రయోగాలు చేస్తున్నాయి. వ్యాక్సిన్ తయారీలో తలమునకలయ్యాయి. ఇలాంటి తరుణంలో వైరస్‌లు మనకు మంచిచేస్తాయని ఒక అధ్యయనం చెబుతోంది. ఇవి క్షీరదాల పునరుత్పత్తి సామర్థ్యం, మనుగడలో కీలకపాత్ర పోషిస్తాయని తమ అధ్యయనంలో తేలిందని చెప్తున్నారు. ఈ పరిశోధనలకు సంబంధించి వివరాలను నేచర్ స్ట్రక్చరల్ అండ్‌ మాలిక్యులర్ బయాలజీ జర్నల్‌లో ప్రచురితమయ్యాయి.వివరాల్లోకి వెళ్తే సిన్సినాటి చిల్డ్రన్స్ పెరినాటల్ ఇన్‌స్టిట్యూట్‌ (సీసీపీఐ), జపాన్‌లోని అజాబు విశ్వవిద్యాలయంలోని శాస్త్రవేత్తలు ఈ అంశాలపై అధ్యయనం చేశారు. ప్రయోగశాలలో ఎలుకలు, మానవ జెర్మ్‌లైన్ కణాలపై అధ్యయనం చేశారు. క్షీరదాల బీజకణాల్లోని ఎండోజీనస్‌ రెట్రో వైరస్ ల ద్వారా జాతుల నిర్దిష్ట ట్రాన్స్‌ క్రిప్టోమ్‌లు చక్కగా ట్యూన్ చేయబడుతున్నాయని గుర్తించారు. అంటే వీర్యకణాలు ఏర్పడటం ప్రారంభించినప్పుడు అవి అవసరమైన జెర్మ్‌లైన్ జన్యువులను కఠినంగా నియంత్రిస్తాయని తేలిందని నిపుణులు తెలిపారు. ఇవి మానవులు, ఎలుకలులాంటి క్షీరదాల్లో జాతుల-నిర్దిష్ట ట్రాన్స్క్రిప్టోమ్లను చక్కగా తీర్చిదిద్దడానికి సహాయపడుతాయని అధ్యయనంలో తేలింది. దీర్ఘకాలికంగా వైరస్‌లు మనిషి జన్యువు, ఆకృతి పరిణామంపై సానుకూల ప్రభావాలను కలిగి ఉంటాయని అధ్యయనానికి నేతృత్వం వహించిన నేమ్‌కావా వివరించారు.
|
|