పీపీఎఫ్ అకౌంట్ నుంచి డబ్బు తీసుకునేముందు ఇవి గుర్తుంచుకోండి...

రిటైర్మెంట్‌‌ను దృష్టిలో పెట్టుకుని ఇన్వెస్ట్‌మెంట్ చేయాలనుకునేవారికి పబ్లిక్ ప్రావిడెంట్ ఫండ్ మంచి వేదిక. ప్రభుత్వ పర్యవేక్షణ ఉండటం దీనికి మరో బెనిఫిట్. ఉద్యోగంలో చేరినప్పటి నుంచి 15ఏళ్లపాటు(లాక్ ఇన్ పీరియడ్) పీపీఎఫ్ అకౌంట్ నుంచి డబ్బు విత్‌డ్రా చేసుకోవడం కుదరదు. అంటే పీపీఎఫ్‌లో ఉన్న మన డబ్బు మొత్తం తీసుకోవడానికి 15 సంవత్సరాలు వేచి ఉండాల్సిందే. ఈ వ్యవధిలో దీంట్లో చేసిన పొదుపు, పెట్టుబడులకు కాంపౌండ్ వడ్డీ ద్వారా మంచి ఆదాయం వచ్చే అవకాశం ఉంది. కానీ అవసరాల దృష్ట్యా మధ్యలోనే డబ్బు తీసుకోవడం లేదా పీపీఎఫ్ అకౌంట్ను మెచురిటీకి (ప్రీ మెచురిటీ) ముందుగానే మూసేయడం వంటివి చేయొచ్చు. ఇలాంటి సందర్భాలు ఎదురైప్పుడు పాటించాల్సిన నియమ నిబంధనల గురించి తెలుసుకుందాం.పీపీఎఫ్‌లో ప్రీ మెచూర్ క్లోజర్ అయిదేళ్ల తరువాతే సాధ్యమవుతుంది. అదీ కొన్ని నియమ నిబంధనలకు లోబడే ఉంటుంది. కుటుంబంలో ఎవరైనా ఏదైనా వ్యాధి లేదా ఇతర సమస్యలతో జీవన్మరణ స్థితికి చేరుకున్నప్పుడు, కుటుంబ పెద్ద, లేదా అతడిపై ఆధారపడ్డ పిల్లల పైచదువులకు డబ్బు అవసరమైనప్పుడు, ఒక ప్రదేశం నుంచి మరో ప్రదేశానికి ఇళ్లు మారుతున్నప్పుడు... ఈ మూడు అవసరాలకు పీపీఎఫ్ అకౌంట్ నుంచి డబ్బు తీసుకోవచ్చు. లేదా అకౌంట్‌ను ప్రీ మెచూర్ విధానంలో పూర్తిగా మూసేయవచ్చు. ఇందుకు అకౌంట్ ఓపెన్ చేసినప్పటి నుంచి మూసేసే వరకు ఉన్న వ్యవధిలో ఒక శాతం వడ్డీ తీసివేస్తారు. అంటే... ఒకవేళ మదుపు చేసిన వ్యక్తికి ఏడు శాతం వడ్డీ వస్తుంది అనుకుంటే... అతడు ప్రీ మెచూర్ స్థాయిలో అకౌంట్ మూసివేస్తే వచ్చే వడ్డీ ఆరుశాతానికి కుదిస్తారు.పీపీఎఫ్‌లో నమోదు చేసుకున్న ఒక సంవత్సరం తరువాత నుంచి అయిదేళ్ల లోపు గడువులో లోన్ తీసుకునే అవకాశం ఉంది. ఇది కాకుండా మదుపు చేసిన అయిదేళ్ల తరువాత పీఎఫ్ అకౌంట్ నుంచి డబ్బు తీసుకోవచ్చు. కానీ సేవింగ్స్ మొత్తంలో 50శాతం మాత్రమే తీసుకునే వెసులుబాటు ఉంది. ఆ తరువాత ప్రతి ఆర్థిక సంవత్సరంలో ఒక్కసారి మాత్రమే డబ్బు విత్‌డ్రా చేసుకోవచ్చు. ఇందుకు పీపీఎఫ్ అకౌంట్ ఉన్న బ్యాంకులో చందాదారుడు ఫామ్ సి ని సమర్పించాలి. అకౌంట్ నంబరు, తీసుకోవాల్సిన డబ్బు, తదితర వివరాలను అందులో పొందుపరచాలి. ఒకవేళ అకౌంటు మైనర్ పేరుతో ఉంటే... ఆ అకౌంట్ నుంచి తీసిన డబ్బు మైనర్ కోసమే వెచ్చిస్తామనే డిక్లరేషన్ పత్రాన్ని సమర్పించాలి. అకౌంట్లో ఉండే అసలు, ప్రీ మెచూర్ విత్‌డ్రాలపై ఎలాంటి పన్నులూ ఉండవు.