కరోనా వైరస్ వ్యాక్సిన్ ఫార్ములా హ్యాకింగ్

ప్రపంచవ్యాప్తంగా కరోనా వైరస్ వ్యాక్సిన్ కోసం ముమ్మర పరిశోధనలు కొనసాగుతున్నాయి. కొన్ని టీకాలు మూడో దశ క్లినికల్ ట్రయల్స్‌లోకి ప్రవేశించాయి. ఇదిలా ఉండగా.. వ్యాక్సిన్ సమాచారాన్ని తస్కరించడానికి చైనా ఇంటెలిజెన్స్ హ్యాకర్లు ప్రయత్నిస్తున్నారని అమెరికా ఆరోపిస్తోంది. టైమ్స్ ఆఫ్ ఇండియా కథనం మేరకు.. వ్యాక్సిన్ డేటాను దొంగిలించాలనే ఉద్దేశంతో ఉన్న హ్యాకర్లు.. ఫార్మా కంపెనీలకు బదులుగా, నార్త్ కరోలినా యూనివర్సిటీ, ఇతర పరిశోధన సంస్థలపై డిజిటల్ నిఘా నిర్వహించినట్టు అమెరికా పేర్కొంది. అటు, రష్యా నిఘా సంస్థ ఎస్వీఆర్ సైతం అమెరికా, కెనడా, బ్రిటన్‌లోని వ్యాక్సిన్ ప్రయోగాలను లక్ష్యంగా చేసుకున్నాయి. ఈ విషయాన్ని అంతర్జాతీయ ఫైబర్ ఆప్టిక్ కేబుల్‌ను పర్యవేక్షించే బ్రిటిషన్ గూఢచారి సంస్థ తొలిసారి గుర్తించింది. ఇరాన్ కూడా వ్యాక్సిన్ సమాచారాన్ని తస్కరించే ప్రయత్నాలు మొదలుపెట్టింది. ఈ నేపథ్యంలో తన శత్రువుల గూఢచర్యాన్ని గుర్తించి, భద్రతను పెంచడానికి అమెరికా ప్రయత్నాలను వేగవంతం చేసింది. సంక్షిప్తంగా ప్రపంచవ్యాప్తంగా ఉన్న ప్రతి ప్రధాన గూఢచారి సంస్థలు మిగతా వారి ప్రయోగాలు, పరిశోధనలు వివరాలను తెలుసుకోవడానికి ప్రయత్నిస్తున్నాయి.ప్రస్తుత, మాజీ ఇంటెలిజెన్స్ అధికారులు, గూఢచారుల ప్రయత్నాలపై నిఘా వేసిన వ్యక్తుల ఇంటర్వ్యూల ప్రకారం.. కరోనా వైరస్ మహమ్మారి ప్రపంచంలోని ఇంటెలిజెన్స్ ఏజెన్సీల కోసం ఇటీవలి కాలంలో అత్యంత వేగవంతమైన మిషన్ మార్పులలో ఒకదాన్ని ప్రేరేపించింది. దాదాపు అమెరికా విరోధులు ఆ దేశం పరిశోధనలను దొంగిలించే ప్రయత్నాలను తీవ్రం చేయడంతో విశ్వవిద్యాలయాలు, సంస్థలను రక్షించడానికి అధికార యంత్రాంగం చర్యలు ప్రారంభించింది. సాధారణంగా రష్యన్ ట్యాంకులు, ఉగ్రవాద కదలికలపై నిఘా ఉంచే నాటో ఇంటెలిజెన్స్.. టీకా పరిశోధన సమాచారాన్ని తస్కరించే హ్యాకర్లపై నిఘా ఉంచిందని ఓ అధికారి తెలిపారు. అమెరికా, ఐరోపాలో టీకా హ్యాకింగ్ ప్రయత్నాలకు ప్రపంచ ఆరోగ్య సంస్థ సమాచారాన్ని చైనా రహస్యంగా ఉపయోగించుకున్నట్టు ఇంటెలిజెన్స్‌కు చెందిన ఓ మాజీ అధికారి అన్నారు. అయితే, డబ్ల్యూహెచ్‌ఓ చైనా ఎంత వరకు ప్రభావితం చేసి, ప్రపంచవ్యాప్తంగా ఉన్న వ్యాక్సిన్ పరిశోధన సమాచారం తస్కరించిందో ఖచ్చితంగా చెప్పలేమని ఆయన వ్యాఖ్యానించారు. అయితే, కరోనా వైరస్ అమెరికాలో అడుగుపెట్టిన తొలినాళ్లలోనే వ్యాక్సిన్ పరిశోధన డేటా హ్యాకింగ్‌పై దృష్టిసారించిందని నిఘా వర్గాలు అంటున్నాయి.