మళ్లీ అందుబాటులోకి టిక్ టాక్?
Andhra Pradesh Telugu | Suryaa Desk | Published : Fri, Sep 04, 2020, 03:05 PM
భారత్,చైనా సరిహద్దులో నెలకొన్న ఉద్రిక్త పరిస్థితులతో టిక్ టాక్ తో సహా 59 యాప్ లను భారత ప్రభుత్వం నిషేధించిన విషయం తెలిసిందే. తాజాగా మరో 119 యాప్స్ ను కేంద్రం నిషేధించింది. టిక్ టాక్ యాప్ కు భారత్ లో భారీగా డిమాండ్ ఉండడంతో కంపెనీ కోట్లలో నష్టపోయింది. భారత్ బాటలోనే మరి కొన్ని దేశాలు టిక్ టాక్ ను నిషేధించాయి. చైనా కంపెనీగా టిక్ టాక్ కు ముద్ర పడడంతో దీనిని తొలగించుకునేందుకు టిక్ టాక్ యాజమాన్యం దిద్దుబాటు చర్యలు చేపట్టింది. దీంతో టిక్ టాక్ అనేక దేశాల్లో తమ కార్యకలాపాలను విక్రయించే పనిలో పడింది.టిక్ టాక్ ను ఇండియాకు సాఫ్ట్ బ్యాంక్ తీసుకురానునట్టుగా తెలుస్తోంది. సాఫ్ట్ బ్యాంక్ గ్రూపు కార్పొరేషన్ టిక్ టాక్ ఇండియా కోసం బిడ్డర్లను పరిశీలిస్తోంది. ఇండియాలో టిక్ టాక్ వాటాలపై స్థానిక పార్ట్ నర్లతో కలిసి బిడ్డింగ్ కోసం అన్వేషిస్తోంది. చైనీస్ పేరంట్ కంపెనీ ByteDance Ltdలో వాటా ఉన్న జపనీస్ గ్రూపు, భారత రిలయన్స్ జియో ఇన్ఫోకామ్ లిమిటెడ్, భారతీ ఎయిర్ టెల్ లిమిటెడ్ అధినేతలతో సాఫ్ట్ బ్యాంకు గత నెలగా సుదీర్ఘంగా చర్చలు జరుపుతోంది. ప్రస్తుతానికి ఈ చర్చల వివరాలను ప్రైవేటుగా ఉంచినట్టు సంబంధిత వర్గాల సమాచారం. సాఫ్ట్ బ్యాంకు, బైట్ డాన్స్, రిలయన్స్, భారతీ ఎయిర్ టెల్ కు చెందిన ప్రతినిధులు దీనిపై స్పందించేందుకు నిరాకరించారు. కానీ త్వరలోనే చైనాకు సంబంధం లేకుండా భారత్ లో టిక్ టాక్ యాప్ ను మళ్లీ అందుబాటులోకి తెచ్చే అవకాశం ఉంది.
|
|