ఇతర ఆదాయాలున్న ఉద్యోగులకు గుడ్ న్యూస్

ఇతర ఆదాయాలున్నా వేతన జీవులకు కొంచెం రిలీఫ్ దొరకనుంది. జీతమే కాకుండా మీ మూల ధన లాభాలపై ఆదాయపు పన్ను నుంచి కొంత మినహాయింపు ఉండనుంది మరీ ఐటీఆర్ 2ను ఎలా ఫైల్ చేసుకోవాలో తెలుసా..?ఆదాయ పన్నును కచ్చితంగా వసూలు చేసేందుకు కేంద్ర ప్రభుత్వం మరింత పక్కాగా ముందుకు కదులుతుంది. ఇక నుంచి ఐటీ శాఖ ఆదాయపు పన్నును ముక్కుపిండి వసూలు చేయనుంది. పెద్ద ఆదాయం ఉన్నవాళ్లు తప్పనిసరిగా ఐటీ రిటర్న్‌లు ఫైల్‌ చేయాల్సిందే. దీనికోసం కేంద్ర ప్రత్యక్ష పన్నుల బోర్డు (సీబీడీటీ) మొత్తం ఎనిమిది కొత్త ఐటీఆర్‌ ఫారాలు విడుదల చేసింది. ఇందులో ఐటీఆర్‌-1, ఐటీఆర్‌-2, ఐటీఆర్‌-3, ఐటీఆర్‌-4ల్లో రూ.కోటి లేదా అంతకు మించిన కరెంట్‌ ఖాతా డిపాజిట్ల వివరాలు, లక్ష రూపాయలు లేదా అంతకు మించిన కరెంట్‌ బిల్లుల వివరాలు, రూ.2 లక్షలు లేదా అంతకు మించిన విదేశీ ప్రయాణ ఖర్చుల వివరాలు సమర్పించాల్సి ఉంటుంది.ఐటీఆర్ 1 అనేది వార్షిక ఆదాయం రూ.50 లక్షలు మించని వ్యక్తులు, గృహ ఆస్తుల ఉమ్మడి యజమానులు ఫైల్ చేసుకోవాల్సి ఉంటుంది. ఐటీఆర్ - 2 అనేది జీతంతో పాటు రెసిడెన్షియల్‌ ప్రాపర్టీ ఆదాయం ఉన్న వ్యక్తులు ఫైల్ చేయాలి. అంటే ఉద్యోగంతో పాటు ఒకటి కంటే ఎక్కువ ఆస్తి మూలధన లాభాలు ఉన్న వాళ్లు, వ్యాపారం లేదా వృత్తి కాకుండా ఇతర వనరుల నుంచి ఆదాయం పొందే వ్యక్తులు ITR-2ను సబ్మిట్ చేసి, మినహాయింపులు కోరవచ్చు. దీంతో పన్ను నుంచి కొంత మినహాయింపు దొరుకుతంది. ITR-2 ఫైలింగ్ చేయడం ద్వారా జీతం నుంచి గరిష్టంగా 50,000 రూపాయల వరకు ప్రామాణిక మినహాయింపు పొందవచ్చు.నిజానికి ఐటీఆర్ -1, ఐటీఆర్ -4 విషయంలో ఇ-ఫైలింగ్ పోర్టల్లో ఐటీఆర్ నేరుగా ఫైల్ చేసే సౌకర్యం ఉంది. కానీ ఐటీఆర్-2 విషయంలో ఆ వెసులుబాటు లేదు.ఐటీఆర్ 2 ఫైల్ చేయాలంటే ఇ-ఫైలింగ్ పోర్టల్‌‌ సందర్శించి... ఇన్‌కమ్ టాక్స్ రిటర్న్ ప్రిపరేషన్ యుటిలిటీస్ కింద ఆఫ్‌లైన్‌లో ఐటీఆర్ -2 యుటిలిటీ ఫైల్‌ను డౌన్‌లోడ్ చేసుకోవాలి. అందులో అన్ని వివరాలను నమోదు చేసిన తరువాత ఉత్పత్తి చేసిన ఎక్స్‌ఎంఎల్‌ ఫైల్ అప్‌లోడ్ చేయడం ద్వారా ఐటీఆర్ -2 ని ఫైల్ చేయవచ్చు.ఏదిఏమైనా ఐటీఆర్ ఇవ్వడానికి అర్హత ఉన్న వ్యక్తి ఆదాయపు పన్ను చట్టం ప్రకారం ఆదాయాన్ని మినహాయించినప్పటికీ ఐటీఆర్‌లోని అన్ని ఆదాయాలు, నష్టాలను తప్పనిసరిగా బహిర్గతం చేయాలి.