పాము పగ..నెలలో 8 సార్లు కాటు

పాము పగబడుతుందా అన్నది ఇప్పటి వరకు ఎలాంటి ఆధారం లేదు. కానీ ఆధునిక యుగంలో కూడా పాము పగబడుతుంది అంటూ ఇంకా ప్రచారం ఉంది. పాము పగ పన్నెండేళ్లు.. నాలో రగిలే పగ వెయ్యేళ్లు అని ఓ తెలుగు సినిమా పాట కూడా ఉంది. పాము పగ పడితే విడవదనే కాబోలు సినిమాలో ఈ పాట రాశారు సినీకవి. ఈ మాటలను నిజం చేస్తూ ఓ పాము ఓ యువకుడిని ఒక నెలలో ఎనిమిది సార్లు కరిచింది. దాంతో ఆ యువకుడు కరిచినప్పుడల్లా ఆసుపత్రికి వెళ్లి తన ప్రాణాలు కాపాడుకుంటున్నాడు. నిత్యం ఆ పాము ఎక్కడినుంచి వచ్చి కాటు వేస్తుందోనని తెలియక అతడు నిద్రాహారాలు మాని భయాందోళనకు గురవుతున్నాడు.ఈ ఘటన ఉత్తరప్రదేశ్‌లోని బస్తీ జిల్లాలోని రాంపూర్ గ్రామంలో చోటు చేసుకుంది. వివరాల్లోకి వెళ్తే యశ్‌రాజ్ మిశ్రా(17). ఒకే నెలలో అతడిని పాము ఎనిమిదిసార్లు కాటేసింది. పాము కరిచిన ప్రతిసారి స్థానికంగా వైద్యం పొందుతున్నాడు. ఊరికే ఆ పాము కరుస్తోందని ప్లేసు మారి చూద్దామని చూశాడు. బహదూర్‌పూర్‌లోని బంధువుల ఇంటికి వెళ్లాడు. అయితే ఆ పాము అక్కడికి వెళ్లి మరీ ఆ యువకుడిని కాటు వేసింది. దాంతో అతను షాక్ అయ్యాడు. యువకుడి తల్లిదండ్రులు ఈ విషయమై తీవ్ర ఆందోళనకు గురవుతున్నారు.పామును పట్టుకునే అతడిని పిలిపించినా అతడికి కూడా దొరకలేదు. దాంతో ఆ కుటుంబంలో అశాంతి నెలకొంది. ఆ పాము ఎప్పుడు, ఎటు వైపు నుంచి వచ్చి తమ కొడుకును కాటేస్తుందో తెలియకపోవడంతో ఆ కుటుంబం బోరున విలపించింది. పాము పగ పట్టి ఉంటుందని స్థానిక పూజారుల సూచన మేరకు పూజలు కూడా చేశారు. అయినా లాభం లేకుండా పోయింది. ఆ పాము బారి నుంచి తమకొడుకును కాపాడాలని ఆ తల్లిదండ్రులు కోరుకుంటున్నారు. ఈ ఘటన స్థానికంగా అందరిని ఆశ్చర్యానికి గురి చేస్తుంది.