రాజకీయాలకు అతీతంగా అభివృద్ధి చేయాలి

ఎమ్మిగనూరు నియోజకవర్గ మాజీ శాసన సభ్యులు బివి జయనాగేశ్వర స్థానిక ఎమ్మిగనూరు పట్టణంలోని తన స్వగృహంలో మీడియా సమావేశంలో మాట్లాడుతూ.. ఎమ్మిగనూరు నియోజకవర్గంలో రాజకీయాలకు అతీతంగా అభివృద్ధి చేయాలి అని పేర్కొన్నారు. ప్రజలు వైసిపి పార్టీకి పట్టం కట్టారని ప్రజల తీర్పుకు ప్రతిపక్ష పాత్ర పోషిస్తున్నారని పేర్కొన్నారు. గతంలో శాసనసభ్యులుగా ఉన్న సమయంలో నిర్వహించి వివిధ అభివృద్ధి పనులు, మంజూరై పెండింగ్ లో ఉన్న అభివృద్ధి పనులను పూర్తి చేసి ఎమ్మిగనూరు నియోజకవర్గ ప్రజలకు అభివృద్ధి పరంగా అండగా ఉండాలి అని వైసిపి ప్రజా ప్రతినిధులకు తెలియజేశారు. గతంలో టిడిపి ప్రభుత్వ హయాంలో మంజూరైన కర్నూలు జిల్లా ప్రజల చిరకాల కల అయినా ఆర్డీఎస్ ప్రాజెక్టును, గుండ్రేవుల రిజర్వాయర్ పనులను త్వరితగతిన పూర్తి చేసి అటు కర్నూలు జిల్లా ప్రజలకు, ఇటు ఎమ్మిగనూరు నియోజకవర్గ ప్రజలకు త్రాగు, సాగునీటి సమస్య పరిష్కరించాలని కోరారు.తన హయాంలో మంజూరైన ఎస్ ఎస్ ట్యాంక్ 2 ను పూర్తీ చేసి ఎమ్మిగనూరు పట్టణ ప్రజలకు త్రాగునీటి సమస్య తొలగించాలని మరియు ఎమ్మిగనూరు పట్టణంలోని చేనేత ప్రజల బాగుకోసం బనవాసి దగ్గర మంజూరు చేసిన టెక్స్ టైల్స్ పార్కును, ఎమ్మిగనూరు పట్టణంలో 2 చేనేత క్లస్టర్ లను త్వరగా పూర్తి చేసి చేనేతల సమస్యలను తీర్చాలని కోరారు. వాల్మీకి సోదరుల కోసం ఎమ్మిగనూరు పట్టణ నడిబొడ్డులో పోస్టాఫిసు దగ్గర వాల్మీకి భవన్ కోసం స్థలాన్ని కేటాయించి 50 లక్షల రూపాయల నిధులు ఎంపీ నిధుల ద్వారా కేటాయించామని వాల్మీకి భవనము త్వరితగతిన పూర్తిచేయాలన్నారు. మైనారిటీ కాలనీలో గల షాదీఖానా అభివృద్ధి కోసం, జామియా మసీదు ( పెద్ద మసీదు ) పునర్ నిర్మాణం కోసం నిధులు కేటాయించామని, మైనారిటీ కాలనీ అభివృద్ధి కోసం రోడ్లను, డ్రైనేజీలను మంజూరు చేశారు దానిని వెంటనే పూర్తి చేయాలన్నారు.గతంలో ఎస్సీల కోసం సుమారు రూ. 2 కోట్ల రూపాయలతో వ్యాయామ శాలను మంజూరు చేశామని, పట్టణంలో అంబేద్కర్ భవన్ కోసం కొన్ని కోట్ల విలువైన స్థలాన్ని కేటాయించామని అంబేద్కర్ భవన్ ను పూర్తిచేయాలని కోరారు. నాగలదిన్నె బ్రిడ్జి నిర్మాణాన్ని వెంటనే పూర్తి చేయాలని, ఈ బ్రిడ్జి నిర్మాణం పూర్తి కావడం వలన రాకపోకలు పెరిగి మార్కెటింగ్ వ్యవస్థ పెరుగుతుందని పేర్కొన్నారు. ఎమ్మిగనూరు నియోజకవర్గంలో కులమతాలకు, రాజకీయాలకు అతీతంగా అభివృద్ధి చేయాలని పత్రికా ముఖంగా కోరడం జరిగింది.