లొంగిపోనున్న మావోయిస్టు అగ్రనేత గణపతి..?

మావోయిస్టు పార్టీ అగ్రనేత ముప్పాళ్ల లక్ష్మణరావు అలియాస్ గణపతి పోలీసుల ఎదుట లొంగిపోనున్నట్లు తెలుస్తోంది. వయసు పైబడిన రీత్యా గణపతి ఆరోగ్య సమస్యలతో బాధపడుతున్నట్లు తెలుస్తోంది. ఈ నేపథ్యంలో లక్ష్మణరావు లొంగిపోనున్నట్లు విశ్వసనీయవర్గాల సమాచారం.గణపతి దాదాపు మూడు దశాబ్దాల పాటు నక్సల్స్ కార్యకలాపాల్లో క్రియాశీల పాత్ర పోషించారు. సుదీర్ఘ కాలం పాటు మావోయిస్టు కేంద్ర కమిటీ కార్యదర్శిగా పని చేసిన గణపతి 2018లో ఆ బాధ్యతల నుంచి వైదొలిగారు. ఆయన స్థానంలో నంబాల కేశవరావు బాధ్యతలు స్వీకరిచారు.దేశంలోనే మోస్ట్‌ వాంటెడ్‌ మావోయిస్టుగా ఉన్న లక్ష్మణరావు తలపై ప్రభుత్వం భారీ రివార్డు కూడా ప్రకటించింది. లొంగుబాటుకు సంబంధించి తాజాగా ప్రభుత్వానికి, గణపతి అనుచరులకు మధ్య చర్చలు జరుగుతున్నాయని ఇంటెలిజెన్స్ వర్గాల ద్వారా తెలిసింది. 74 ఏళ్ల గణపతి పీపుల్స్ వార్ ఉద్యమంలో కీలక పాత్ర పోషించారు. గత మూడేళ్ల క్రితమే ఉబ్బసం, మోకాళ్ల నొప్పులు, మధుమేహం వంటి సమస్యలతో బాధపడుతున్న ఆయన అనారోగ్యం కారణంగా కీలక పదవి నుంచి తప్పుకోవడం అప్పట్లో చర్చనీయాంశంగా మారింది.గత కొంత కాలంగా అనారోగ్యంతో ఉన్న ఆయనని క్యాడర్ దండకారణ్యంలో మోసుకుంటూ తిప్పుతున్నట్లు తెలుస్తోంది. ఇక వారిని ఇబ్బంది పెట్టడం ఇష్టం లేని గణపతి లొంగిపోయి చికిత్స పొందాలన్న నిర్ణయానికి వచ్చారని సమాచారం. మావోయిస్ట్ అగ్రనేత గణపతి లొంగుబాటు కోసం తెలంగాణ, మహారాష్ట్ర, చత్తీస్‌గడ్‌ పోలీసులు దశాబ్దాల కాలంగా ఎదురుచూస్తున్నారు. గణపతి లొంగుబాటు కోసం తెలంగాణ పోలీసులు ప్రత్యేక చొరవ తీసుకుంటున్నట్టు తెలుస్తోంది. ఈయన లొంగు బాటుకు కేంద్రం కూడా సానుకూలంగా ఉన్నట్లు తెలుస్తోంది.గణపతి లొంగుబాటు లాంఛనమైతే ఆయనతో పాటు కీలక లీడర్ లు మరికొంత మంది కూడా లొంగిపోయేందుకు సిద్ధంగా ఉన్నారని తెలుస్తోంది. అదే జరిగితే మావోయిస్టు పార్టీ ఉనికి ప్రశ్నార్థకంగా మారే అవకాశాలే అత్యధికంగా కనిపిస్తున్నాయి. పీపుల్స్ వార్ పార్టీని ఆ తరువాత కాలంలో మావోయిస్టు పార్టీగా రూపాంతరం చెందించడంలోనూ, దేశ వ్యాప్తంగా ఈ విప్లవ సామ్రాజ్యాన్ని విస్తరించడంలోనూ గణపతి కీలక భూమిక పోషించిన సంగతి తెలిసిందే.