మరిదితో అఫైర్‌..అడ్డొస్తున్నాడని భర్త హత్య

మరిది వరుసయ్యే వ్యక్తితో అక్రమ సంబంధం పెట్టుకున్న ఓ మహిళ తన సుఖానికి అడ్డొస్తున్నాడని కట్టుకున్న భర్తనే కిరాతకంగా చంపేసిందని టీఓఐ కథనం పేర్కొంది. బీహార్‌లోని బేగూసరాయ్ ప్రాంతానికి చెందిన రాంసింగ్, సుశీల దంపతులు కూలిపనులు చేస్తూ జీవిస్తున్నారు. వీరికి ఇద్దరు పిల్లలున్నారు. అయితే సుశీల కొంతకాలంగా మరిది వరుసయ్యే లాల్‌సింగ్ అనే యువకుడితో అక్రమ సంబంధం పెట్టుకుంది. భర్త కళ్లుగప్పి తరుచూ ప్రియుడితో రాసలీలలు కొనసాగిస్తూ వస్తోంది. ఈ విషయం తెలుసుకున్న రాంసింగ్ పద్ధతిగా ఉండాలని భార్యను హెచ్చరించినా ఆమెలో ఎలాంటి మార్పు రాలేదు.ఈ వ్యవహారంతో దంపతుల మధ్య తరుచూ గొడవలు జరుగుతున్నాయి. దీంతో తన సుఖానికి అడ్డొస్తున్న భర్తను చంపేయాలని సుశీల ప్లాన్ వేసింది. ప్రియుడితో ఊరి చివర విందు ఏర్పాటు చేసి భర్తను ఆహ్వానించేలా చేసింది. దీనికి హాజరైన రాంసింగ్ ఫుల్లుగా మద్యం తాగి మత్తులోకి జారుకున్నాడు. అనంతరం లాల్‌సింగ్ ‌ ప్రియురాలి భర్తను రాళ్లతో కొట్టి చంపేశాడు. మృతదేహాన్ని ఎవరూ గుర్తుపట్టకుండా ఆకులు కప్పేసి పరారయ్యాడు. మరుసటి రోజు ఉదయం భర్త తనను వదిలేసి ఎక్కడికో వెళ్లిపోయాడంటూ సుశీల కొత్త నాటకానికి దారితీసింది.అయితే సుశీల ప్రవర్తనపై అనుమానం వచ్చిన స్థానికులు పంచాయతీ పెట్టాలని నిర్ణయించారు. దీంతో భయపడిన సుశీల కిరోసిన్ పోసుకుని ఆత్మహత్యాయత్నం చేసింది. తీవ్రంగా గాయపడిన ఆమెను స్థానికులు ఆస్పత్రికి తరలించారు. దీనిపై సమాచారం అందుకున్న పోలీసులు ఆమెను ప్రశ్నించగా భర్తను హత్య చేసిన విషయం బయటపెట్టింది. దీంతో పోలీసులు సుశీల, లాల్‌సింగ్ పై కేసు నమోదు చేసి దర్యాప్తు చేపట్టారు.