కోవిడ్ ఆస్పత్రిలో తొలి ట్రాన్స్ జెండర్ వైద్యురాలు..ప్రశంసల జల్లు

కరోనా వైరస్ ను కట్టడి చేయడంలో వైద్యులు ముందు వరుసలో ఉన్నారు. అందుకే వైద్యులను కరోనా వారియర్స్ గా అభివర్ణిస్తున్నారు. ఇలాంటి తరుణంలో ఈ శాన్య రాష్ట్రాల్లో తొలి ట్రాన్స్ జెండర్ డాక్టర్ గా పేరొందిన డాక్టర్ బీన్సీ లైష్రామ్ కరోనా వారియర్ గా సేవలందిస్తున్నారు. మణిపూర్‌ ఇంఫాల్‌లోని శిజా హాస్పిటల్స్ అండ్ రిసెర్చ్ ఇన్‌స్టిట్యూట్‌లో రెసిడెంట్ మెడికల్ ఆఫీసర్‌గా బీన్సీ లైష్రామ్ సేవలందిస్తున్నారు. కరోనా వారియర్ గా విశేష సేవలందిస్తున్నారు. తాను డాక్టర్ కావాలనే కలను సాకారం చేసుకోవటానికి ఎన్నో అవమానాలకు ఎదుర్కొన్నట్లు తెలిపారు.అయితే తాను పని చేస్తున్న హాస్పిటల్ లో మాత్రం తోటి వైద్యులు..ఇతర సిబ్బంది మంచి సహకారం అందిస్తున్నారని చెప్పుకొచ్చారు. మెడిసిన్ చదివే రోజుల్లో కొన్ని అవమానాలు ఎదుర్కోక తప్పలేదన్నారు. అయినప్పటికీ తన కలను సాకారం చేసుకోవాలనే పట్టుదలతో వాటన్నింటిని తట్టుకున్నట్లు తెలిపారు. తన లక్ష్యం ముందు ఆ అవమానాలు చాలా చిన్నవిగా అనిపించాయని అందువల్లే వాటిని పట్టించుకోలేదని తెలిపారు. డాక్టర్ కావాలనేది తన కోరిక అని ఆ కలను సాకారం చేసేందుకు ఎన్నో కష్టాలు ఎదుర్కొన్నట్లు తెలిపారు బీన్సీ లైష్రామ్.ఇకపోతే తాను పుట్టినప్పుడు అబ్బాయిగానే పుట్టినట్లు చెప్పుకొచ్చిన బిన్సీ అప్పుతు తన పేరు బోబోయి లైష్రామ్ అని చెప్పుకొచ్చారు. అయితే 9,10 క్లాసులకు వచ్చేసరికి తన శరీరంలో మార్పులు రావటంతో తన కుటుంబ సభ్యులు తనను అసహ్యించుకునే వారని తెలిపారు. తన కన్న తండ్రే తనను చంపాలని చూశాడని ఆవేదన వ్యక్తం చేశారు. కన్నవాళ్లే చంపాలని చూస్తే తానేమైపోవాలి..డాక్టర్ కావాలనే తన కలను ఎలా నిజం చేసుకోవాలి? నాకల నెరవేరదా? అని తల్లడిల్లిపోయినట్లు బీన్సీ చెప్పుకొచ్చారు. డాక్టర్ కావాలనే తన లక్ష్యం కోసం అహర్నిశలు శ్రమించినట్లు తెలిపారు. పుదుచ్చేరిలో ఆపరేషన్ చేయించుకుని పూర్తి స్త్రీగా మారిపోయినట్లు తెలిపారు.ఆ తరువాత సమాజం తనను పోస్ట్ -ఆపరేటివ్ ట్రాన్ ఉమెన్ గా గుర్తించినట్లు చెప్పుకొచ్చారు. మనిషిగా పుట్టిన అందరూ సమానమేనని జెండర్ ను బట్టి ఒకరు ఎక్కువ ఒకరు తక్కువ అని చూడటం ఏమాత్రం సరికాదని బీన్సీ అంటున్నారు. మరోవైపు డా.బీన్సీ సేవలపై శిజా హాస్పిటల్స్ అండ్ రిసెర్చ్ ఇన్‌స్టిట్యూట్‌ మెడికల్ సూపరింటెండెంట్, ప్రముఖ సర్జన్ సోరోఖైబామ్ జుగింద్ర హర్షం వ్యక్తం చేశారు. ఈ హాస్పిటల్ లో ఆమెను డాక్టర్ గా నియమించుకోవటానికి తాము ఏమాత్రం ఆలోచించలేదని చెప్పుకొచ్చారు. ఆమె ఒక డాక్టర్ గా మాత్రమే చూశామని తెలిపారు.తన సేవలతో పలు అవార్డులు గెలుచుకున్న బీన్సీ ఎంతో అంకిత భావంతో పనిచేస్తుంటారని కొనియాడారు. ఏమాత్రం విశ్రాంతి అనేది ఆమె తీసుకోకుండా రోగులకు సేవలు చేయటంలో ఆమె స్ఫూర్తి అభినందనీయమని కొనియాడారు. ఈశాన్య రాష్ట్రాల్లో తొలి ట్రాన్స్ జెండర్ డాక్టర్ బిన్సీ లైష్రామ్ ఆస్పత్రులో అందిస్తున్న సేవలను పలువురు ప్రశంసిస్తున్నారు. నిరంతరం ఆస్పత్రిలో ఉంటూ వైద్య సేవలందిస్తున్న ఆమెకు సోషల్ మీడియాలో నెటిజన్లు పొగడ్తలతో ముంచెత్తుతున్నారు.