జిల్లాలో విద్యార్థి ఇంటికి మధ్యాహ్న భోజనం..

కర్నూలు జిల్లా వ్యాప్తంగా ఆంధ్రప్రదేశ్ రాష్ట్ర ప్రభుత్వం ‘జగనన్న గోరుముద్ద’ పథకం కింద ముడిబియ్యం, కోడిగుడ్లు, చిక్కీలను ప్రభుత్వ పాఠశాల విద్యార్థులకు పంపిణీ చేయనుంది. కాగా కర్నూలు జిల్లాలో 78 ప్రభుత్వ పాఠశాలలు ఉన్నాయి.జిల్లా పరిషత్‌, మండల పరిషత్‌ పాఠశాలలు 2,422 ఉండగా 36 ఆదర్శ పాఠశాలలు, 53 కేజీబీవీలు, 142 పురపాలక తదితర పాఠశాలలున్నాయి. ఇందులో మొత్తం 6,65,701 మంది విద్యార్థులు చదువుతున్నారు. సెప్టెంబరు 1 నుంచి గోరుముద్ద సరకులను నేరుగా విద్యార్థులకు అందజేయనున్నారు. ఈ మేరకు జిల్లా విద్యాశాఖ ఇప్పటికే ప్రణాళికలు రూపొందించింది. కరోనా ప్రభావంతో పాఠశాలలు ఐదు నెలల నుంచి మూతపడ్డాయి. ప్రభుత్వ పాఠశాలల్లో అమలవుతున్న మధ్యాహ్న భోజన పథకంలో భాగంగా రోజుకు ఎన్ని గ్రాముల బియ్యం ఇచ్చేవారో అంతే మోతాదులో ప్రస్తుతం లెక్క కట్టి మూతపడిన పాఠశాల పనిదినాలను లెక్కించి విద్యార్థులకు అందించనున్నారు. ఈ ఏడాది జూన్‌ 12 నుంచి పాఠశాలలు తెరచుకోవాల్సింది.కానీ కరోనా ఉద్ధృతితో ఇంతవరకు ఈ విద్యాసంవత్సరం ప్రారంభం కాలేదు. ఆ ప్రకారం జూన్‌ 12 నుంచి ఆగస్టు నెలాఖరు వరకు పాఠశాలలు 62 పనిదినాలు కోల్పోయినట్లు గుర్తించి ప్రభుత్వం ఆమేరకు విద్యార్థులకు ముడిబియ్యం, గుడ్లు, చిక్కీలు అందజేయనుంది. ఇప్పటికే ఇందుకు సంబంధించిన కార్యాచరణ ప్రణాళిక జిల్లా విద్యాశాఖ రూపొందించి ఆ దిశగా ఏర్పాట్లు చేస్తోంది.జిల్లా వ్యాప్తంగా సెప్టెంబరు 1 నుంచి 7 వరకు ఒక విడత, సెప్టెంబరు 9 నుంచి 15 వరకు రెండో విడతగా విద్యార్థులకు వీటిని పంపిణీ చేయనున్నారు. ప్రాథమిక, ప్రాథమికోన్నత, ఉన్నత పాఠశాల విద్యార్థులకు ఒక్కొక్కరికి 35 చిక్కీలు అందించనున్నారు. పంపిణీ మొత్తం ఆయా పాఠశాలల ఉపాధ్యాయుల ఆధ్వర్యంలోనే జరుగనుంది. ఈమేరకు ఇప్పటికే ఆదేశాలు కూడా వెలువడ్డాయి.