అత్తింటి వేధింపులకు మరో వివాహిత బలి

అత్తమామలు, భర్త వేధింపులు భరించలేక తొమ్మిది నెలల బిడ్డతో సహా ఓ వివాహిత బలవన్మరణానికి పాల్పడింది. తాము నివాసముంటున్న అపార్ట్‌మెంట్ పైనుంచి బిడ్డను తోసేసి తానూ దూకి ఆత్మహత్య చేసుకున్న విషాద ఘటన గుంటూరు నగరంలోని లక్ష్మీపురంలో చోటుచేసుకుంది. టైమ్స్ ఆఫ్ ఇండియా కథనం మేరకు.. ప్రకాశం జిల్లా పర్చూరు మండలం అన్నంభొట్లవారిపాలేనికి చెందిన నేవీ ఉద్యోగి కళ్యాణ్ చంద్రకి పంగులూరుకి చెందిన మనోజ్ఞ తో మూడేళ్ల కిందట వివాహమైంది. ఎంటెక్ చదివిన మనోజ్ఞ హైదరాబాద్‌లో సాఫ్ట్‌వేర్ ఇంజనీర్‌గా పనిచేసేది. వివాహ సమయంలో భారీగానే కట్నకానుకలు ఇచ్చినట్లు తెలుస్తోంది. పెళ్లైన తర్వాత దంపతులు హైదరాబాద్‌లోని యూసుఫ్‌గూడలో కాపురం పెట్టారు. వారికి తొమ్మిది నెలల కిందట కూతురు తులసి పుట్టింది. భర్త నేవీ ఉద్యోగం కావడంతో డ్యూటీకి వెళ్లిన సమయంలో అత్తమామలు ఇంటికి వచ్చేవారు.గత జనవరిలో మనోజ్ఞ దంపతులు గుంటూరులోని అత్తమామల ఇంటికి వచ్చేశారు. అప్పటి నుంచి నగరంలోని కమలేష్ అపార్ట్‌మెంట్‌లోని ఫ్లాట్‌లో నివాసముంటున్నట్లు తెలుస్తోంది. కొద్దికాలం నుంచి అత్తమామలు, భర్త వేధింపులకు గురిచేస్తుండడంతో మానసికంగా కుంగిపోయిన మనోజ్ఞ దారుణ నిర్ణయం తీసుకుంది. బిడ్డతో సహా బలవన్మరణానికి పాల్పడింది. అత్తింటి వేధింపులతో విసిగిపోయి శనివారం ఉదయం అపార్ట్‌మెంట్ బిల్డింగ్ పై నుంచి దూకి ఆత్మహత్య చేసుకుంది. చిన్నారి అక్కడికక్కడే చనిపోగా తల్లి ఆస్పత్రిలో చికిత్స పొందుతూ ప్రాణాలు విడిచినట్లు తెలుస్తోంది. సమాచారం అందుకున్న మృతురాలి తల్లిదండ్రులు, బంధువులు గుంటూరు చేరుకున్నారు. తన కూతురు, మనవరాలిని అత్తింటి వారే హత్య చేసి ఆత్మహత్యగా చిత్రీకరిస్తున్నారంటూ మృతురాలి తల్లి ఆరోపించారు. ఈ మేరకు పోలీసులకు ఫిర్యాదు చేశారు. పట్టాభిపురం పోలీసులు సంఘటన స్థలానికి చేరుకుని దర్యాప్తు ముమ్మరం చేశారు.