విమానాశ్రయాన్ని దున్నేస్తున్న రైతు

నరితా ఎయిర్‌పోర్ట్... జపాన్‌లోనే రెండో అతిపెద్ద అంతర్జాతీయ విమానాశ్రయం ఇది. రోజూ కొన్ని లక్షల మంది ప్రయాణికులు ఈ విమానాశ్రయం నుంచి రాకపోకలు చేస్తుంటారు. అంత పెద్ద విమానాశ్రయం నిర్వాహకులు, అక్కడ ప్రభుత్వం గత కొన్ని దశాబ్దాలుగా ఓ రైతు కుటుంబంతో పోరాడుతున్నారు. టీఓఐ కథనం ప్రకారం, ఆ రైతన్న పేరు టకావో షిటో.. సుమారు వందేళ్లుగా ఆయన కుటుంబం అక్కడ కూరగాయలను పండిస్తూ జీవితం వెళ్లదీస్తోంది. ఆయన తాత, తండ్రి.. ఆ తర్వాత టకావో ఇలా అంతా వ్యవసాయం మీదే ఆధారపడ్డారు. తండ్రి వ్యవసాయం చేస్తున్నప్పుడు టకావో వేరే చోట పని చేస్తుండేవాడు. 1970లోనే ప్రభుత్వం నరితా విమానాశ్రయాన్ని విస్తరించాలని నిర్ణయించుకుంది.ఈ సందర్భంగా పరిసర ప్రాంతాల్లోని భూములను స్వాధీనం చేసుకోడానికి ప్రయత్నించింది. రైతులకు భారీగా పరిహారం అందించి భూములను సొంతం చేసుకుంది. అయితే, టకావో తండ్రి తన భూములను ఇవ్వబోనని మొండికేశారు. ఆయన కన్ను మూయడంతో టకావో ఉద్యోగాన్ని వదిలి ఆయన బాధ్యతలు స్వీకరించాడు. అక్కడే వ్యవసాయం చేస్తూ తండ్రి బాటలో నడుస్తున్నారు.అప్పట్లో టకావోతోపాటు సుమారు 30 కుటుంబాలు అక్కడ వ్యవసాయం చేసేవి. భూసేకరణ వల్ల అక్కడ వ్యవసాయం కనుమరుగైంది. ఇప్పుడు కేవలం టకావో వ్యవసాయ భూమి మాత్రమే మిగిలింది. దీన్ని స్వాధీనం చేసుకోడానికి ప్రభుత్వం భారీ పరిహారం అప్పజెప్పేందుకు ముందుకొచ్చింది. 180 మిలియన్ యెన్ (రూ.12,67,39,329) ఇస్తామని చెప్పారు. కానీ ఆ కుటుంబం అంగీకరించలేదు.2018లో స్థానిక కోర్టు విమానాశ్రయానికి అనుకూలంగా తీర్పు ఇచ్చింది. అభివృద్ధి పనుల కోసం ఆ భూమిని విమానాశ్రయంలో కలుపుకోవడం తప్పనిసరని పేర్కొంది. అయితే, ఆ తర్వాతి రోజే పైకోర్టు.. ఆ తీర్పును తాత్కాలికంగా నిలిపివేస్తూ ఉత్తర్వులు జారీ చేసింది. టకావో ఇప్పుడు ఒక్కడు కాదు. అతడికి మద్దుతుగా విద్యార్థి నేతలు సైతం పోరాడుతున్నారు. జపాన్‌లోని వివిధ విశ్వవిద్యాలయాల్లోని విద్యార్థులు టకావో గురించి తెలుసుకుని ఆయనకు మద్దతుగా ఉద్యమిస్తున్నారు.టకావో ఇప్పటికీ విమానాశ్రయం మధ్యలోనే వ్యవసాయం చేస్తున్నారు. రసాయనాలతో పనిలేకుండా సేంద్రీయ ఎరువులతోనే కూరగాయలను పండిస్తున్నారు. ఆయనకు సుమారు 400 మంది కస్టమర్లు ఉన్నారు. అక్కడ పండే పంటలను నిత్యం వారికి సరఫరా చేస్తూ.. ఆ మొత్తంతోనే తన కుటుంబాన్ని నడుపుతున్నాడు. ఆ భూమి కేవలం తన వారసులకే చెందాలి తప్పా.. ఇతరులకు కాదని, తన భూమి రబ్బరు చక్రాల కింద నలిగిపోవడం తనకు ఇష్టం లేదని టకావో అంటున్నారు. భీకరమైన విమాన శబ్దాల మధ్యే జీవిస్తున్నారు.