20 లక్షల మందిని రిక్రూట్ చేసుకోనున్న సీఎస్‌సీ ఈ-గవర్నెన్స్ సర్వీసెస్
Andhra Pradesh Telugu | Suryaa Desk | Published : Sun, Jul 19, 2020, 05:10 PM
కరోనా కష్టకాలంలో ఉన్న ఉద్యోగాలు కూడా పోతున్నాయి. ఇలాంటి సమయంలో భారీగా నియామకాలు చేపడతామంటూ సీఎస్‌సీ ఈ-గవర్నెన్స్ సర్వీసెస్ నిరుద్యోగులకు తీపికబురు అందించింది. ఈ ఏడాది ఏకంగా 20 లక్షల మందిని నియమించుకుంటామని తెలిపింది. దేశవ్యాప్తంగా దాదాపు 4 లక్షల సీఎస్‌సీ సెంటర్లు ఉన్నాయి. ఇవి ప్రజలకు పలు రకాల సర్వీసులు అందిస్తున్నాయి. ప్రభుత్వంతోపాటు ఎంటర్‌ప్రైజెస్ సర్వీసులను కూడా ఆఫర్ చేస్తున్నాయి. చిన్న పట్టణాలు, గ్రామీణ ప్రాంతాల్లో వీటి వల్ల చాలా మంది ప్రయోజనం పొందుతున్నారు.‘ప్రతి సీఎస్‌సీ‌లో ఐదుగురిని నియమించుకుంటాం. వీళ్లు ప్రజలకు డోర్‌స్టెప్ (ఇంటి వద్దకే) సర్వీసులు అందిస్తారు. డెలివరీ ఏజెంట్లుగా పనిచేస్తారు. అలాగే ప్రభుత్వాలకు, ఇతర కంపెనీలకు సీఎస్‌సీ నిర్వహించే సర్వేల్లో కూడా పాల్గొంటారు’ అని సీఎస్‌సీ ఈ-గవర్నెన్స్ సర్వీసెస్ లిమిటెడ్ సీఈవో దినేశ్ త్యాగి తెలిపారు.నెల రోజుల్లో రిజిస్ట్రేషన్ ప్రక్రియను ముగిస్తామన ఆయన పేర్కొన్నారు. తర్వాత వెరిఫికేషన్ పూర్తి చేస్తామని పేర్కొన్నారు. వీరికి నిర్ణీత వేతనం అంటూ ఏమీ ఉండదని, వారు చేసే పని ప్రాతిపదికన డబ్బులు అందిస్తామని వివరించారు. వీళ్లు ఇంటి వద్దకు వెళ్లి కూడా కస్టమర్లకు సర్వీసులు అందించాల్సి ఉంటుందని తెలిపారు.కోవిడ్ 19 సమయంలో ప్రభుత్వం ప్రకటించిన ప్రయోజనాలు ప్రజలకు అందేలా కొత్తగా నియమించుకునే వారు పనిచేస్తారని త్యాగి తెలిపారు. వీళ్లు ఎంఎస్ఎంఈ సహా ప్రతి ఒక్క భారతీయ పౌరుడికి ప్రభుత్వ పథకాల ప్రయోజనాలు అందేలా చూస్తారని పేర్కొన్నారు.
|
|