మరో నెలలో కరోనా వ్యాక్సిన్!
Andhra Pradesh Telugu | Suryaa Desk | Published : Tue, Jul 14, 2020, 05:45 PM
కరోనా వైరస్‌ని అంతం చేసే వ్యాక్సిన్ ట్రయల్స్ పూర్తయ్యాయని రష్యా నుంచి కబురు రావడంతో ప్రపంచం మొత్తం ఎంతో సంతోషపడింది. ఆ వ్యాక్సిన్ ను త్వరగా రిలీజ్ చెయ్యమని కోరింది. దీనిపై రష్యా శాస్త్రవేత్తలు తాజాగా స్పందించారు. ప్రపంచ మొట్టమొదటి కరోనా వ్యాక్సిన్‌ను ఆగష్టు మధ్య నాటికి ప్రారంభించే అవకాశాలు ఉన్నట్లు తెలిపారు. ఈ మధ్యే ట్రయల్స్ విజయవంతంగా పూర్తి చేశామని రష్యాలోని సెచెనోవ్ యూనివర్శిటీ శాస్త్రవేత్తలు తెలిపారు. ప్రభుత్వం ఆధ్వర్యంలో నడుస్తున్న గమలాయి ఇన్‌స్టిట్యూట్ ఆఫ్ ఎపిడెమియోలజీ అండ్ మైక్రోబయాలజీలో వ్యాక్సిన్ తయారవుతోందని తెలిపారు.వారు ఏమన్నారంటే.. "మందులైతే రాత్రికి రాత్రి కోట్ల కొద్దీ ఉత్పత్తి చెయ్యవచ్చు. వ్యాక్సిన్‌లో సూక్ష్మక్రిములు లేదా వాటి జన్యువులూ లేదా వాటి మూలకాలూ ఉంటాయి. అవి స్వయంగా ఉత్పత్తి అవ్వాల్సి ఉంటుంది. అందుకు కొంత టైమ్ పడుతుంది. ప్రత్యేక వాతావరణం అవసరం అవుతుంది. అందుకే వ్యాక్సిన్ తయారీకి కొంత సమయం పడుతుంది. ఓ వైపు వ్యాక్సిన్ తయారీ చేస్తూనే మరోవైపు క్లినికల్ ట్రయల్స్‌లో ఎలాంటి ఫలితాలు వచ్చిందీ తెలుసుకుంటున్నాం". అని సెచెనోవ్ వర్శిటీ పరిశోధకులు తెలిపారు. ఇప్పటివరకూ తమ పరిశోధనలో తాము చేసిన వ్యాక్సిన్ చాలా సేఫ్‌గా ఉందనీ సైడ్ ఎఫెక్ట్స్ లేవనీ చెప్పారు. ఆగష్టు12 నుంచి 14 మధ్య తొలి వ్యాక్సిన్ ప్రజల చేతిలోకి వెళ్తుందనే నమ్మకం తనకు ఉందని గమలాయి ఇన్‌స్టిట్యూట్ డైరెక్టర్ అలెగ్జాండర్ గింట్స్‌బర్గ్ తెలిపారు.
|
|