ముంచిన నిర్లక్ష్యం.. కొట్టుకు పోయిన కారు
Andhra Pradesh Telugu | Suryaa Desk | Published : Sun, Jul 12, 2020, 07:12 PM
నీరు జీవకోటికి ప్రాణాధారం. కానీ ఒక్కో సారి ఆ గంగ ఉగ్రరూపం దాల్చితే చాలా భయంకరంగా ఉంటుంది. వర్షాకాలంలో వాగులు, వంకలు పొంగుతుంటాయి. అలాంటి సమయంలో ఏ మాత్రం నిర్లక్ష్యంగా వ్యవహరించినా ప్రాణాలకే ముప్పు ఉంటుంది. తాజాగా ఖమ్మం జిల్లాలో ఇలాంటి ఘటన ఒకటి చోటుచేసుకుంది. వాగు వరద ఉధృతిని అంచనా వేయడంలో ఓ కారు డ్రైవర్ తప్పడంలో కారు నీటి ప్రవాహంలో కొట్టుకుపోయింది. వివరాల ప్రకారం.. ఖమ్మం జిల్లా బోనకల్లు మండలం రాపల్లి నుంచి చిన్నబీవరల్లి వైపు ఓ కారులో నలుగురు యువకులు ప్రయాణిస్తున్నారు.మార్గమధ్యలో ఓ వాగుపై చిన్నపాటి బ్రిడ్డి ఉంది. శుక్రవారం రాత్రి కురిసి వర్షానికి వాగు ఉప్పొంగింది. వాగును దాటే క్రమంలో వరద నీటి ప్రవాహం అడ్డు వచ్చింది. అయితే కారును నడిపే డ్రైవరు వరద నీటి ప్రవాహాన్ని సరిగ్గా అంచనా వేయలేకపోయాడు. దీంతో వాగును దాటించే క్రమంలో కారు వరద నీటి ఉధృతికి వాగులో పడి కొట్టుకుపోయింది. వెంటనే గమనించిన స్థానికులు ఆ కారులో ప్రయాణిస్తున్న నలుగురు యువకులను అతికష్టం మీద బయటకు తీసుకువచ్చారు. దీంతో కారులోని వారు ప్రాణాలను దక్కించుకున్నారు.
|
|