ఏపీలో చిన్న పరిశ్రమలకు శుభవార్త

లాక్ డౌన్ సూక్ష, చిన్న, మధ్య తరహా పరిశ్రమలను కోలుకోలేని దెబ్బ కొట్టింది. ఈ నేపథ్యంలో ఏపీ సీఎం జగన్ కీలక నిర్ణయం తీసుకున్నారు. ఆ పరిశ్రమలను ఆదుకునేందుకు రూ.1168 కోట్లతో రీస్టార్ట్ ప్యాకేజీ కింద ఏపీ ప్రభుత్వం రెండో విడత రాయితీ బకాయిలను సోమవారం విడుదల చేసింది. అయితే ఇప్పటికే రిస్టార్ట్ ప్యాకేజీలో భాగంగా మే నెలలో రూ.450 కోట్లను విడుదల చేసింది.తాజాగా సోమవారం మరో రూ.512 కోట్ల విడుదల చేస్తూ సీఎం జగన్ నిర్ణయం తీసుకున్నారు. వాస్తవానికి దాదాపు లక్ష సూక్ష్మ, చిన్న, మధ్య తరహా పరిశ్రమలకు 2014-15 నుంచి గత ప్రభుత్వం రూ.827.5 కోట్ల మేర బకాయి ఉంది. ఆ బకాయితో పాటు ఈ సంవత్సరానికి సంబంధించిన రాయితీలను రూ.962.62 కోట్లను రెండు విడతలుగా ప్రకటిస్తామని జగన్ ప్రభుత్వం ముందే ప్రకటన చేసింది. అందులో భాగంగా మొదటి విడత మే నెలలో విడుదల చేయగా, నేడు రెండో విడత డబ్బులను విడుదల చేశారు.ఈ సందర్భంగా సీఎం జగన్ మాట్లాడుతూ.. చిన్న పరిశ్రమలకు తోడుగా ఉంటేనే వారి నిలదొక్కుకుని నలుగురికి ఉద్యోగాలు ఇవ్వగలుగుతారన్నారు. గత ప్రభుత్వం రూ.800 కోట్లను బకాయిలు ఉంచిందని, వాటన్నింటిని తమ ప్రభుత్వం క్లియర్ చేసిందన్నారు. కరోనా వల్ల పరిశ్రమలు నడపలేని పరిస్థితుల్లో వెసులుబాటు ఇచ్చేందుకు ఏప్రిల్, మే, జూన్ నెలలకు సంబంధించి విద్యుత్ ఫిక్స్‌డ్ ఛార్జీలు రూ.180 కోట్లు మాఫీ చేస్తున్నామని సీఎం ప్రకటించారు. దీనికితోడు ఏపీఎస్ఎఫ్సీ ద్వారా రూ.200 కోట్లతో పెట్టుబడి రుణాలను తక్కువ వడ్డీకే అందిస్తున్నామన్నారు. రుణాలకు ఆరు నెలల మారటోరియంతో పాటు మూడు సంవత్సరాల కాలపరిమితితో చెల్లించే అవకాశం ఇచ్చామని చెప్పారు.సూక్ష్మ, చిన్నతరహా పరిశ్రమల నుంచి 25 శాతం ప్రభుత్వమే కొనుగోలు చేయాలని నిర్ణయించినట్టు వివరించారు. ఎంఎస్‌ఎంఈలకు సంబంధించిన వ్యవహారాలను చూసేందుకు ఓ జేసీని నియమిస్తామన్నారు. పనుల కోసం అధికారుల చుట్టూ తిరిగే పరిస్థితి లేకుండా చూస్తామని హామీ ఇచ్చారు. అధికారులు వీరికి చేయూతనిచ్చేలా పనిచేయాలని, అప్పుడే నలుగురికి ఉద్యోగాలు వస్తాయని సీఎం జగన్ అన్నారు.