పట్టాల పై యువతి శవం..దారుణం

రైలు పట్టాలపై ఓ యువతి మృతదేహం లభ్యమైన ఘటన భద్రాద్రి కొత్తగూడెం జిల్లాలో కలకలం సృష్టిస్తోంది. కొత్తగూడెం పట్టణంలోని గంగభిషన్ బస్తీకి చెందిన ఓ యువతి ఇటీవలే ఇంటర్ పూర్తి చేసింది. మంగళవారం అర్ధరాత్రి సమయంలో పొరుగు ఇంట్లో నివసించే యువకుడు గోడ దూకి ఆ యువతి ఇంట్లోకి వెళ్లాడు. ఈ విషయాన్ని గమనించిన యువతి తల్లిదండ్రులు ఆ యువకుడిని పట్టుకొని, మందలించి వాళ్లింటికి తీసుకెళ్లారు. అనంతరం వారు ఇంటికెళ్లేసరికి దీప ఇంట్లో కనిపించలేదు. దీంతో ఆందోళన చెందిన బాధితురాలి తల్లిదండ్రులు వన్ టౌన్ పోలీసులకు ఫిర్యాదు చేశారు. బుధవారం ఉదయం రైల్వే ట్రాక్ మీద యువతి శవం కనిపించడంతో స్థానికులు టూటౌన్ పోలీసులకు సమాచారం అందించారు.రైల్వే పోలీసులకు సమాచారం ఇవ్వగా ప్రభుత్వ ఏరియా హాస్పిటల్‌కు తరలించి పోస్టుమార్టం నిర్వహించారు. తమ కుమార్తెపై అత్యాచారం చేసి హత్య చేశారని, మళ్లీ పోస్టుమార్టం నిర్వహించాలని మృతురాలి తండ్రి పోలీసులను డిమాండ్ చేశారు. దీంతో రీ పోస్ట్‌మార్టం నిర్వహించారు. యువతి శవంగా మారిన తర్వాత పొరుగింటి యువకుడు, అతడి తల్లిదండ్రులు కనిపించకపోవడంతో అనుమానాలు వ్యక్తం అవుతున్నాయి. మృతదేహంపై దుస్తులు సరిగా లేకపోవడంతో ఆమెను రేప్ చేసి హత్య చేసి ఉంటారనే అనుమానాలు స్థానికంగా వ్యక్తం అవుతున్నాయి. ఆమె కుటుంబానికి న్యాయం చేయాలని సోషల్ మీడియాలో పోస్టులు వెల్లువెత్తుతున్నాయి. తెలంగాణ సీఎంవో, మంత్రి కేటీఆర్‌ను ట్యాగ్ చేస్తూ నెటిజన్లు ట్వీట్లు చేస్తున్నారు. ఇంత దారుణ ఘటన జరిగితే పోలీసులు,ప్రభుత్వం ఎందుకు సీరియస్ గా తీసుకోవడం లేదని పలువురు ప్రశ్నిస్తున్నారు. యువతి మరణం ప్రస్తుతం మిస్టరీగా మారింది.