ముద్దు పెట్టినందుకు కోర్టు సంచలన తీర్పు

పరాయి మహిళలు, బాలికలతో వెకిలిచేష్టలకు పాల్పడితే ఉపేక్షించేది లేదని న్యాయస్థానం మరోసారు రుజువుచేసింది. అమ్మాయికి బలవంతంగా ముద్దుపెట్టినందుకు నిందితుడికి ఐదేళ్లు జైలు, జరిమానా విధించింది. చీకట్లో బాలిక నిందితుడిని సరిగ్గా గుర్తుపట్టలేదని నిందితుడి తరఫు లాయర్ చేసిన వాదనను న్యాయస్థానం తోసిపుచ్చింది. ముంబైలోని ఆర్థర్ రోడ్ జైల్లో ఉన్న నిందితుడితో వీడియో కాన్ఫరెన్స్ ద్వారా విచారించిన న్యాయస్థానం నిందితుడిని దోషిగా తేల్చింది. ముంబైలోని యాంటాప్ హిల్ ప్రాంతంలోని మురికివాడకి చెందిన ఎనిమిదేళ్ల బాలిక తన అక్కతో కలసి బాత్రూమ్‌కి వెళ్లింది. మురికివాడలో అందరూ కామన్‌బాత్రూమ్స్‌కి వెళ్లాల్సిందే. వరుసగా పది బాత్రూమ్‌ల వరకూ ఉంటాయి. అక్కడ చీకటిగా ఉండడంతో సెల్‌ఫోన్ లైట్ వేసుకునేందుకు ఇంటికెళ్లి ఫోన్ తీసుకురమ్మని అక్క తన చెల్లెలిని పంపించింది. ఇంటికెళ్లిన చెల్లెలు సెల్‌ఫోన్‌ తీసుకుని తిరిగి వస్తుండగా ఆమె పక్కింట్లో నివాసం ఉంటున్న అబు అబ్దుల్ రెహమాన్ మెహబూబ్ లోహర్ అసభ్యంగా ప్రవర్తించాడు.బాలికను బలవంతంగా లాక్కెళ్లి పెదాలపై(లిప్ కిస్) పెట్టాడు. ఊహించని పరిణామంతో షాక్‌కి గురైన బాలిక ఏడుస్తూ అక్క దగ్గరికెళ్లి జరిగిన విషయం చెప్పింది. అక్కాచెల్లెళ్లు ఇంటికి వచ్చి తల్లిదండ్రులకు విషయం చెప్పారు. ఆగ్రహానికి గురైన బాధితురాలి తండ్రి నిలదీసేందుకు నిందితుడు అబ్దుల్ ఇంటికి వెళ్లగా అతని భార్య మాత్రమే ఉంది. దీంతో ఆయన నేరుగా పోలీస్ స్టేషన్‌కి వెళ్లి ఫిర్యాదు చేశాడు. కామంతో మైనర్ బాలికను లాక్కెళ్లి అసభ్యంగా ప్రవర్తించాడని తెలిపాడు. బాధితురాలి తండ్రి ఫిర్యాదు మేరకు పోలీసులు పోక్సో చట్టం కింద కేసులు నమోదు చేసి విచారణ చేపట్టి నిందితుడిని అదుపులోకి తీసుకున్నారు. ఈ కేసుపై న్యాయస్థానం విచారణ చేపట్టింది. ముంబైలోని ఆర్థర్ జైలులో ఉన్న నిందితుడిని వీడియో కాన్ఫరెన్స్ ద్వారా విచారించారు. చీకట్లో బాలిక సరిగ్గా గుర్తుపట్టలేదన్న నిందితుడి లాయర్ వాదనలను కోర్టు పరిగణలోకి తీసుకోలేదు. ఎనిమిదేళ్ల బాలికకు అబద్ధం చెప్పాల్సిన అవసరం లేదని.. పైగా నిందితుడిని ఆమె కోర్టులోనూ గుర్తుపట్టిందని బాధితురాలి లాయర్ వినిపించిన వాదనలతో కోర్టు ఏకీభవించింది. నిందితుడిని దోషిగా నిర్ధారించి ఐదేళ్ల జైలుశిక్ష సహా ఐదు వేల జరిమానా విధిస్తూ తీర్పు వెలువరించింది.