కరోనా నుంచి దేశం ఏం నేర్చుకోవాలి?

కరోనా వైరస్ ను అత్యంత పక్కాగా కట్టడి చేసిన దేశంగా తైవాన్ నిలిచింది. మరో ఉపద్రవం ఏదైనా తలెత్తినా సిద్ధంగా ఉండేందుకు తైవాన్ సన్నద్ధమవుతోంది. ఫుడ్, నిత్యావసరాలు, పీపీఈ కిట్లు, వెంటిలేటర్లను సిద్ధం చేసుకుంటున్నట్లు ఆ దేశ ఎకనామిక్ ఎఫైర్స్ వైస్ మినిస్టర్ లిన్ చాన్ నెంగ్ ఓ ఇంటర్వ్యూలో చెప్పారు. కావాల్సిన వస్తువులు సరిపడా ఉన్నాయా లేవా అన్నవి చూసుకుని సిద్ధం చేసుకుంటున్నాయి. కావాల్సిన అత్యవసర వస్తువులను వాళ్లే తయారు చేసుకుంటున్నారు. కరోనాపై పోరాటంలో తైవన్ కావాల్సిన అన్ని వస్తువులను ముందస్తుగానే కలిగి ఉండాలనే పాఠం నేర్చుకుంది.చైనా ఒత్తిడి కారణంగా తైవాన్ వరల్డ్ హెల్త్ ఆర్గనైజేషన్ నుంచి బయటకు రావాల్సి వచ్చింది. దీంతో ఎవరి సహాయం లేకుండానే తైవాన్ తానే సొంతంగా కరోనాపై పోరాడాల్సి వచ్చింది. తైవాన్ లో మొదటి కేసు జనవరి 21న రిపోర్ట్ అయ్యింది. అక్కడ మొత్తం 24 మిలియన్ల జనాభా ఉండగా కేవలం 500 ఇన్ఫెక్షన్లు, 7గురు మృతులతో అక్కడ కరోనాను కట్టడి చేశారు. అక్కడ పాఠశాలలను, వ్యాపారాలను మూసివేయకుండానే ఈ ఘనతను సాధించి ప్రపంచ దేశాలకు అద్భుత సందేశమిచ్చారు.ఇక్కడ ప్రభుత్వం ముందుగా ప్రజలకు మాస్కులను పంపిణీ చేసింది. స్థానికంగానే మాస్కులను తయారీ చేసి ఎగుమతులను నిలిపివేసింది. ప్రభుత్వ సహకారంతో కంపెనీలు నిత్యం రెండు మిలియన్ల మాస్కుల కెపాసిటీ నుంచి 20 మిలియన్ల కెపాసిటీ స్థాయికి చేరాయి. వెంటిలేటర్లు, ఇతర అత్యవసర వస్తువుల తయారీని సైతం ఇదే మాదిరిగా నిర్వహించి కరోనాను కట్టడి చేసింది. భవిష్యత్ లోనూ ఇలాంటి ఉపద్రవాలు ఎదురైతే తట్టుకోవడానికి ఆ దేశం సన్నద్ధంగా ఉంది.ఆ దేశం నుంచి మనమేం నేర్చుకోవాలి..మన దేశంలో కరోనా కేసులు ప్రారంభమైన సమయంలో కనీసం సరిపడా మాస్కులు లేక కొరత ఏర్పడింది. పీపీఈ కిట్లు, వెంటిలేటర్లకు తీవ్ర కొరత ఏర్పడింది. అనేక చోట్ల వైద్యులకే పీపీఈ కిట్లు లేక ఆందోళన వ్యక్తం చేశారు. ముందుగా మన దేశం సన్నద్ధం కాకపోవడంతో ఈ పరిస్థితి ఏర్పడింది. ఇప్పుడు పరిస్థితిలో కొంత మేర మార్పు వచ్చింది. ప్రస్తుత అవసరాలకే కాకుండా.. భవిష్యత్ అవసరాలకు సైతం దేశం సన్నద్ధం అవ్వాల్సిన పరిస్థితి ఏర్పడింది. మనం కరోనా చికిత్స, ఇతర వైద్యం కోసం సరిపడా వైద్య సదుపాయాలు, అందుకు వినియోగించే వస్తువులను మన దేశంలోనే తయారు చేసుకోవాల్సిన అవసరం ఏర్పడింది. ప్రస్తుతం కరోనా పోయినా.. భవిష్యత్ లో వేరే ఏదైనా ఇలాంటి ఉపద్రవం వచ్చినా అందుకు తగినట్లుగా సిద్ధంగా ఉంచాల్సిన అవసరం ఉంది. కరోనా నేర్పిన పాఠాలతో వైద్య రంగాన్ని బలోపేతం చేసుకోవాలని నిపుణులు సూచిస్తున్నారు.