భారత్ లో అప్పుడప్పుడు వికటాట్టహాసం చేస్తున్న జాత్యహంకార ఘటనలు

జాత్యహంకారం... ప్రపంచాన్ని పట్టి పీడిస్తున్న సమస్యల్లో ఇదొకటి. ప్రస్తుతం అమెరికాను కుదిపేస్తున్న ఈ మదోన్మాదం భారత్ లో కూడా అప్పుడప్పుడు కోరలు చాస్తోంది. ముఖ్యంగా ఈశాన్య భారతీయులు దీన్ని ఎక్కువగా ఎదుర్కొంటారు. ప్రముఖ నగరాల్లోని కొంతమందికి ఈశాన్య భారతీయుల పట్ల చిన్నచూపు ఉంది. ముంబై, బెంగళూరు లాంటి నగరాల్లో వారిని కరోనా పేరుతో హేళన చేసిన సందర్భాలు కూడా మనం చూసాం. ముంబైలో ఓ ఆకతాయి మణిపురీ యువతిపై ఉమ్మివేసిన ఘటన తీవ్ర కలకలం రేపింది. అదేవిధంగా చాలా రాష్ట్రాల్లో జాత్యహంకార ఘటనలు అప్పుడప్పుడు వికటాట్టహాసం చేస్తున్నాయి. పాశ్చాత్య దేశాలతో పోలిస్తే భారత్ లో తక్కువగానే ఉన్నప్పటికీ దాన్ని కూకటివేళ్లతో సహా పెకటించి వేయాల్సిన అవసరముంది.ఇండియన్‌ ప్రీమియర్‌ లీగ్‌లో సన్‌రైజర్స్‌కు ఆడిన సమయంలో తనపై జాత్యంహకార వ్యాఖ్యలు చేశారని వెస్టిండీస్ మాజీ కెప్టెన్ సామి మండిపడ్డాడు. 'నేను ఐపీఎల్‌లో సన్‌రైజర్స్‌ జట్టుకు ఆడేటప్పుడు నాతో పాటు శ్రీలంక ఆటగాడు తిసార పెరీరాను 'కలు' అనే పదంతో పిలిచేవారు. అప్పట్లో కలు అంటే బలమైన నల్లమనిషి అని అనుకున్నా. ఆ సమయంలో వారు నన్ను పొగుడుతున్నారని భావించాను. కానీ ఇప్పుడు ఆ పదానికి అసలైన అర్థం ఏంటో తెలుసుకున్నా. నాతో పాటు పెరీరాపైకూడా సన్‌రైజర్స్‌ జట్టులోని ఆటగాళ్లు జాత్యహంకార పదం ఉపయోగించారని వాపోయాడు. సైమండ్స్ పై కూడా వాంఖడే ప్రేక్షకులు ఒకానొక సందర్భంలో ఇలాగే నోరుపారేసుకున్నారు.అతిథులను గౌరవించడం ఎలాగో భారత్ ను చూసి అందరూ నేర్చుకోవాలని విదేశీయులు ఎన్నో సందర్భాల్లో మనల్ని పొగిడారు. అలాంటి దేశంలో జాత్యహంకారానికి తావులేదు. ప్రతీఒక్కరూ తోటి భారతీయుల పట్ల సహోదర భావంతో మెలగాలని సామాజికవేత్తలు అభిప్రాయపడుతున్నారు. విదేశాల్లో ఉంటున్న భారతీయులు తరచుగా ఈ వివక్షను ఎదుర్కొంటున్నారు. అమెరికా, యూరప్ తదితర దేశాల్లో ఈ తరహా పోకడలు ఎక్కువ. తామే అధికులమనే భావంతో ఎదుటివారిని తక్కువగా చూసే ధోరణి మార్చుకోవాలని మేధావులు హితవు పలుకుతున్నారు.