ఆ సరస్సు ఓ అంతుచిక్కని మిస్టరీ!

మహారాష్ట్రలో ఓ గుండ్రని సరస్సు ఇప్పటికీ ఓ అంతుచిక్కని మిస్టరీగానే ఉంది. చంద్రుడి మీద మాత్రమే కనిపించే బిలాలు ప్రపంచంలో మరెక్కడా ఉండవు. భూమిపై కేవలం అగ్నిపర్వత బిలాలు మాత్రమే ఉన్నాయి. కానీ, చంద్రుడి బిలాన్ని పోలిన సరస్సులు ఎక్కడా లేవు. ఇది ప్రపంచంలోనే బసాల్టిక్‌ రాక్స్‌లో కనుగొన్న ఒకే ఒక్క బిలం సరస్సు. అందుకే దీన్ని జాతీయ భూ వారసత్వ స్మారక సరస్సు‌గా గుర్తించారు. అయితే, ఇది ఎప్పుడు? ఎలా ఏర్పడిందనేది స్పష్టత లేదు. ఇది దేవతలు కొలువైన ప్రాంతమని, ఈ సరస్సులోని నీటికి ఎన్నో శక్తులు ఉన్నాయని స్థానికులు నమ్ముతారు. ఇప్పుడు ఈ సరస్సు రాత్రికి రాత్రే పింక్ రంగులోకి మారడం ఆశ్చర్యం కలిగిస్తోంది. ఇప్పటికీ చెక్కు చెదరకుండా కనిపించే చంద్రుడి బిలం సరస్సు మహారాష్ట్రలోని బుల్దానా జిల్లా లోనార్‌లో ఉంది. ఈ సరస్సు గురించి స్కంద, పద్మ పురాణాల్లో సైతం ప్రస్తావన ఉంది. ఈ చారిత్రక ప్రాంతాన్ని చాళుక్యులు, రాష్ట్రకూటులు పాలించారు. ఇక్కడ ఎన్నో ఆలయాలు కొలువై ఉండేవి. అయితే, కాలక్రమేనా అవి బిలంలో నీటి అడుగుకు చేరుకున్నాయి. వీటిలో కొన్ని ఆలయాలు మాత్రమే బయటకు కనిపిస్తాయి.ఈ బిలం ఎలా ఏర్పడిందనేది ఇప్పటికీ మిస్టరీనే. దీనిపై పరిశోధనలు జరిపిన శాస్త్రవేత్తలు 50 వేల ఏళ్ల కిందట ఇది ఏర్పడినట్లు గుర్తించారు. 2010లో నిర్వహించిన స్టడీలో ఈ బిలం వయస్సు 5,70,000 నుంచి 47 వేల మధ్యలో ఉండవచ్చని అంచనా వేశారు. ప్రస్తుతం ఇది అతి పెద్ద గుండ్రని సరస్సులా కనిపిస్తోంది. ఈ సరస్సులోని నీటిని పరీక్షించిన శాస్త్రవేత్తలు.. ఇందులో సోడియం క్లోరైడ్, కార్బోనేట్, ఫ్లోరైడ్ ఉన్నట్లు కనుగొన్నారు. నీటిలో ఆల్కలీన్ శాతం ఎక్కువగా ఉన్నట్లు గుర్తించారు. ఈ సరస్సును సీతా నహనీ అని కూడా అంటారు. అంటే.. సీతా దేవి అక్కడ స్నానం చేశారని స్థానికుల విశ్వాసం. ఉల్కాపాతం జరిగిన తర్వాత అక్కడ భూమిపై 600 మీటర్ల గొయ్యి ఏర్పడిందని, అదే క్రమేనా సరస్సుగా మారిందని అంటారు. అయితే, ఇప్పటి వరకు ఇది శాస్త్రీయంగా నిరూపితం కాలేదు. తాజాగా ఈ సరస్సు రాత్రికి రాత్రే తన రంగు మార్చుకుంది. దీంతో ప్రజలు, పర్యావరణవేత్తలు, శాస్త్రవేత్తలు ఆశ్చర్యపోతున్నారు. సరస్సులోని లవణీయత, ఆల్గే కారణం వల్లే ఇది గులాబీ రంగులోకి మారి ఉంటుందని మరికొందరు అభిప్రాయపడుతున్నారు. ఈ సరస్సుపై నివృతి కాని సందేహాలు ఇంకా మిస్టరీగానే ఉన్నాయి.