థర్మాకోల్ ప్లేట్ల తయారీ - లక్షల్లో ఆదాయం

మన దగ్గర ఉన్న బిజినెస్ ఐడియాతో పాటు మార్కెటింగ్ పై అవగాహన ఉంటే స్వయం ఉపాధి ద్వారా ఆదాయం పొందడం ఈ రోజుల్లో పెద్ద కష్టమేమీ కాదు. నిత్య జీవితంలో మన చుట్టూ ఉండే అవసరాలను గమనించి వాటినే ఆదాయవనరుగా చేసుకుంటే డబ్బు సంపాదించడం మరింత సులువు. ఇలాంటి ఒక వ్యాపార మార్గమే "థర్మాకోల్ ప్లేట్ల తయారీ" బిజినెస్. ప్రస్తుత కాలంలో పెళ్లిళ్ల కైనా, రిసెప్షన్ల కైనా, బర్త్ డే పార్టీలకైనా ఫంక్షన్ ఏదైనా సరే బఫె పద్ధతిలో విందు ఇవ్వడం అనేది సర్వసాధారణం అయిపోయింది. సహజంగా ఈ బఫె పద్ధతిలో విందు ఇవ్వడానికి థర్మాకోల్ ప్లేట్లను ఎక్కువగా వాడుతుంటారు. శుభకార్యాలకే కాకుండా స్ట్రీట్ ఫుడ్ స్టాల్స్ లో సైతం వీటి వాడకం ఎక్కువ. ఇలా వీటి వాడకం నిత్యం ఉండటంవల్ల ఈ థర్మాకోల్ ప్లేట్లకు మంచి డిమాండ్ వుంది. అందువలన వీటి అవసరాన్ని ఆదాయ వనరుగా మలచుకుని లక్షల్లో డబ్బు సంపాదించుకోవడానికి మంచి అవకాశం ఉంది. ఇక ఈ థర్మాకోల్ ప్లేట్ల తయారీ వ్యాపారానికి సంబంధించిన వివరాలను ఇప్పుడు తెలుసుకుందాం.

ఏ వ్యాపారం ప్రారంభించడానికైనా ముందుగా మనకి కొన్ని పరికరాలు మరియు ముడిసరుకు అవసరం ఉంటుంది. అలాగే ఈ వ్యాపారానికి కూడా కొన్ని అవసరమైన వస్తువులు ఉన్నాయి. అవే "థర్మాకోల్ ప్లేట్స్ తయారీ మిషన్" మరియు "రా థర్మాకోల్ షీట్స్". వీటితోపాటు ప్లేట్ల తయారీ కొరకు కరెంటు సదుపాయం కలిగిన షెడ్డు లేదా ఒక గది కావాల్సి ఉంటుంది. ఇక తయారీ విషయానికి వస్తే ముందుగా రా థర్మాకోల్ షీట్ ను మిషన్ లో పెట్టి ఆపరేట్ చేసిన వెంటనే మిషన్ ఆ రా షీట్ ను క్రష్ చేస్తుంది. దీంతో వెంటనే మనకి ప్లేటు సిద్ధమవుతుంది. మిషన్ లో వాడే రకరకాలైన అచ్చుల ఆధారంగా వివిధ రకాలైన ప్లేట్లు తయారవుతాయి.

ఇక పెట్టుబడి మరియు ఇతర ఖర్చుల విషయాలు చూసుకున్నట్లయితే థర్మాకోల్ ప్లేట్లు తయారు చేసే సెమీ ఆటోమేటిక్ మిషన్ విలువ సుమారు 1,50,000/- రూపాయల నుంచి 2,00,000/- రూపాయల వరకు ఉంటుంది. ఒక కేజీ రా థర్మాకోల్ షీట్ మెటీరియల్ విలువ 130/- రూపాయల వరకు ఉంటుంది ఒక కేజీ రా థర్మాకోల్ షీట్ నుండి మనం 10 ఇంచ్ సైజ్ ఉన్న 150 పీసులు థర్మాకోల్ ప్లేట్లను తయారు చేయవచ్చు. ఒక్కో ప్లేట్ కు 2 రూపాయల చొప్పున వీటిని అమ్మినట్లయితే ఒక కేజీ రా మెటీరియల్ మీద మనకి 300/- రూపాయల ఆదాయం లభిస్తుంది. ఈ 300/- రూపాయలలో రా మెటీరియల్ ఖర్చు, పనివారి ఖర్చులు, కరెంట్, అద్దె తీసేస్తే మనకి సుమారు 150/- రూపాయల వరకు లాభం వస్తుంది. ఇలా రోజుకి 50 కేజీల రా మెటీరియల్ షీట్ను ప్రాసెస్ చేయడం ద్వారా రోజుకు 7500/- రూపాయలు, నెలకు 2,25,000/- రూపాయలు ఆదాయం సమకూరుతుంది.

ఇతర వివరాలు

ఇలా ఈ వ్యాపారం ద్వారా మనం లక్షల్లో లాభాలు పొందవచ్చు. ఈ బిజినెస్ లో ఒక ముఖ్యమైన ఘట్టం మార్కెటింగ్. మనం కనుక బాగా మార్కెటింగ్ చేసుకున్నట్లయితే ఈ ఉపాధి మార్గం ద్వారా డబ్బులు సంపాదించడం ఎంతో సులువు. ముందుగా ఈ థర్మాకోల్ ప్లేట్లకు ఏఏ ప్రాంతాల్లో డిమాండ్ ఎలా ఉంది, కాంపిటీషన్ ఎలా ఉంది అన్న విషయాలను పరిగణనలోకి తీసుకుని ఆయా ప్రాంతాల్లోని షాపుల యజమానులతో మాట్లాడుకుని వ్యాపారం ప్రారంభించడం ఉత్తమం.