ఫేస్‌బుక్ చిచ్చు.. భార్యకు గుండు

భార్య ఫేస్ బుక్ లో మరో వ్యక్తితో సన్నిహితంగా ఉండడంతో తట్టుకోలేకపోయిన ఆ భర్త దారుణానికి ఒడిట్టాడు. ఆమెకు గుండు గీయించి ఓ గదిలో బంధించాడు. ఫేస్‌బుక్‌ ఫ్రెండ్స్‌ సాయంతో బాధితురాలు అధికారులకు సమాచారం ఇవ్వడంతో ఈ ఘటన బయటపడింది. వివరాల ప్రకారం.. తమిళనాడు రాష్ట్రంలోని ఈరోడ్‌ జిల్లా పెరుందురై అలంగాట్టు తోట్టం వావికడై ప్రాంతానికి చెందిన ఓ వ్యక్తి వ్యవసాయం చేస్తూ కుటుంబాన్ని పోషిస్తున్నాడు. అతడికి భార్య, కుమారుడు(16), కుమార్తె(15) ఉన్నారు. పచ్చగా ఉన్న వీరి కాపురంలో స్మార్ట్ ఫోన్ చిచ్చు పెట్టింది. కొన్నాళ్లుగా స్మార్ట్ ఫోన్ వినియోగిస్తున్న ఇతడి భార్య ఫేస్‌బుక్‌కు బానిసైంది. నిత్యం గంటల తరబడి చాటింగ్ చేస్తూ కుటుంబాన్ని పట్టించుకోవడం మానేసింది. కొన్నాళ్లకు షణ్ముగయ్య అనే ఫేస్‌బుక్‌ ఫ్రెండ్‌తో ఆమెకు అక్రమ సంబంధం ఏర్పడింది. భర్త పొలానికి వెళ్లిన సమయంలో షణ్ముగయ్య ఇంటికి వచ్చి ఆమెతో రాసలీలలు సాగిస్తున్నాడు.భర్త ఇదేంటని నిలదీయగా.. తాను అందంగా ఉండడంతో ఫేస్‌బుక్‌లో చాలామంది ఫ్రెండ్ రిక్వెస్టులు పెడుతున్నారని, తన వ్యక్తిగత విషయంలో జోక్యం చేసుకోవద్దంటూ ఎదురుతిరిగింది. దీంతో ఆగ్రహంతో ఊగిపోయిన భర్త తమ్ముడి సాయంతో భార్య కాళ్లు, చేతులు కట్టేసి గదిలో బంధించాడు. గుండు గీయించి అంద విహీనంగా మార్చాడు. కొద్దిరోజుల తర్వాత బాధితురాలు ఫేస్‌బుక్‌ ఫ్రెండ్స్ ద్వారా బయటపెట్టింది. అధికారుల దృష్టికి విషయం పోవడంతో వారు వచ్చి బాధితురాలిని వ్యానులో తరలిస్తుండగా భర్త బైక్‌పై వచ్చి అడ్డుకున్నాడు. అధికారులు అతడికి గుర్తింపు కార్డులు చూపించిన తర్వాత బాధితురాలిని కలెక్టరేట్‌కు తీసుకెళ్లారు. ఆమె ఫిర్యాదుతో పోలీసులు భర్త, మరిదిపై కేసు నమోదు చేశారు. ఫేస్‌బుక్‌ వల్ల తన భార్య మతిస్థిమితం కోల్పోయిందని, అందువల్ల చికిత్స కోసం గుండు గీయించినట్లు ఆమె భర్త పోలీసులకు చెబుతున్నాడు. నిజనిజాలు తేల్చేందుకు కేసుపై పోలీసులు దర్యాప్తు చేస్తున్నారు.