శ్రీశైలం దేవస్థానంలో భారీ కుంభకోణం..!
Andhra Pradesh Telugu | Suryaa Desk | Published : Mon, Jun 01, 2020, 04:50 PM
శ్రీశైల దేవస్థానం ఆర్జిత సేవా టిక్కెట్లు, దర్శన కౌంటర్లు, డొనేషన్‌ కౌంటర్, పెట్రోల్‌ బంక్‌లో జరిగిన భారీ కుంభకోణంలో సంచలన విషయాలు వెలుగులోకి వస్తున్నాయి. ఈ కుంభకోణంలో 20 మంది ప్రమేయం ఉన్నట్లు ఫిర్యాదు అందగా, మరో ఆరుగురి హస్తం కూడా ఉన్నట్లు పోలీసుల విచారణలో తేలింది. టిఒఐ కథనం మేరకు.. నిందితుల్లో 16 మంది నిజాన్ని ఒప్పుకొని, నిధులు ఎలా స్వాహా చేశారో చెప్పారని డీఎస్పీ వెంకట్రావ్‌ వెల్లడించారు. ముఖ్యంగా దేవస్థానంలో కంప్యూటర్‌ విభాగంలో పనిచేస్తున్న దార్శెల్లి, రూపేష్‌ ప్రధాన పాత్రధారులుగా ఉన్నట్లు తెలిసింది. ఒకరి ఐడీపై మరొకరు టిక్కెట్లను అక్రమ మార్గంలో విక్రయించారని తేలింది. సాంకేతికతను ఆధారం చేసుకుని ఫేక్‌ ఐడీని సృష్టించి దాని ద్వారా అక్రమార్జనకు పాల్పడినట్లు విచారణలో తేలింది. ఈ ప్రక్రియ అంతా 2017లో జరిగినట్లుగా పోలీసులు నిర్ధారించారు. దేవస్థానం ఈఓ ఇచ్చిన ఫిర్యాదులో పేర్కొన్న వారే కాకుండా పోలీసుల విచారణలో హరినాయక్, చంద్ర, మురళీధర్‌రెడ్డి, రామనాయుడు, అనీల్, నరసింహులు హస్తం కూడా ఉన్నట్లు నిర్ధారించారు. మొత్తం మీద 23 మంది నిందితులు అక్రమాలను ఒప్పుకోవడంతో వీరి నుంచి అక్రమార్జిత సొమ్మును సాధ్యమైనంతవరకు రికవరీ చేసేందుకు పోలీసులు ప్రయత్నిస్తున్నట్లు సమాచారం.
|
|