వారికి అవమానం..రాత్రంతా కారులోనే
Andhra Pradesh Telugu | Suryaa Desk | Published : Mon, May 11, 2020, 04:50 PM
కరోనా భయంతో ఓ వైద్యుని కుటుంబానికి అవమానం జరిగింది. దీంతో వారు రాత్రంతా కారులోనే ఉండాల్సిన పరిస్థితి ఏర్పడింది. ఈ ఘటనకు సంబంధించిన వివరాలిలా ఉన్నాయి. ఒరిస్సా రాజధాని భువనేశ్వర్ కు సమీపంలో ఉన్న గొండొరొపూర్ గ్రామానికి చెందిన డాక్టర్ రాఖీ సింఘ్ తెలంగాణలో పని చేస్తున్నారు. ఆయన ఆదివారం తన స్వగ్రామానికి అన్ని అనుమతి పత్రాలతో వచ్చాడు. ఐతే విషయం తెలుసుకున్న స్థానికులు ఆయనను అడ్డుకున్నారు. ఊళ్లోకి రావద్దంటూ ఆందోళన చేశారు. దీంతో దిక్కు తోచని స్థితిలో ఆయన కుటుంబం ఆదివారం రాత్రంతా కారులోనే గడిపింది.అధికారులు చెప్పినా గ్రామస్థులు వినలేదు. డాక్టర్ కరోనా రోగులకు చికిత్స చేశారని, అది తమ పై ప్రభావం చూపుతుందని వారు ఆందోళన వ్యక్తం చేశారు. సోమవారం ఉదయం కొందరు వారి కారు పైకి రాళ్లు కూడా విసిరారు. దీంతో డాక్టర్ రాఖీ సింఘ్ జంట నగరాల పోలీసు కమిషనర్‌ సుధాంశు షడంగికి ఫిర్యాదు చేశారు. పలువురి పై చర్యలు తీసుకోవాలని ఆయన కోరారు. కరోనా వేళ డాక్టర్లు తమ ప్రాణాలకు తెగించి చికిత్స అందిస్తుంటే వారిని గౌరవించాల్సింది పోయి అవమాన పరచడం పై విమర్శలు వ్యక్తమవుతున్నాయి.
|
|