విశాఖలో వందలాదిమందిని కాపాడిన పబ్జీ గేమ్!

విశాఖపట్నంలోని వెంకటాపురం గ్రామంలో గురువారం తెల్లవారుజామున ఎల్జీ పాలిమర్స్ ప్లాంట్ నుంచి ఘోరమైన గ్యాస్ లీక్ కావడంతో పారిశ్రామిక సైరన్ లేదా అధికారుల నుండి వచ్చిన హెచ్చరిక వందలాది మంది ప్రాణాలను రక్షించలేదు. ప్లాంట్ నుండి స్టైరిన్ రసాయన లీకేజ్ జరిగిన వెంటనే గ్రామస్తులు పారిపోవడానికి పబ్జీ గేమ్ కారణమైంది. నేడు పబ్జీ గేమ్ వల్ల వందలాది మంది గ్రామస్తులు తమ ప్రాణాలను కాపాడుకున్నారు. మరి ఆ గేమ్ వల్ల వారి ప్రాణాలను ఎలా కాపాడుకున్నారో ఇప్పుడు తెలుసుకుందాం.

సుమారు 1,500 గృహాలతో ఉన్న వెంకటాపురం జనాభా 4,000 కన్నా ఎక్కువ. రేవు దగ్గర ఉన్న గ్రామంలోని పాలిమర్ ప్లాంట్ అనేది దశాబ్దాలుగా ఉంది. అక్కడే ఇరుగుపొరుగు జీవనం సాగిస్తున్నారు. గ్యాస్ లీక్ కావడం వల్ల ఆ ప్రాంతం ఒక్కసారిగా హడలిపోయింది. గురువారం రాత్రి సరిగ్గా 2.30 గంటల సమయంలో పాతల సురేష్ అనే 27 ఏళ్ల వెంకటాపురం గ్రామానికి చెందిన యువకుడు పబ్జీ గేమ్ ఆడుతున్నాడు. అదే గ్రామానికి చెందిన తన స్నేహితుడు కిరణ్ కు ఉన్నట్టుండి ఫోన్ చేశాడు. ఏదో ఘాటైన వాసన వస్తోందని ఇద్దరూ మాట్లాడుకున్నారు. అంతలో కిరణ్ అప్రమత్తమయ్యాడు. గ్యాస్ లీక్ అయిన చోట నుంచి తన గ్రామానికి 200 మీటర్ల దూరం ఉంది.

కిరణ్ మరియు సురేష్ ఇద్దరూ మరికొంత మంది స్నేహితులను పిలిచి విషయాన్ని చెప్పారు. స్నేహితులందరూ పొగతో కప్పబడిన వాసన వీధుల గుండా రావడాన్ని గమనించారు. ఏం జరిగిందో ఆరా తీయడానికి ప్లాంట్ సెక్యూరిటీకి కాల్ చేయాలనుకున్నారు. ఒక స్టైరిన్ లీక్ అయ్యి ఉందని గమనించి ఒక స్నేహితుడు వెంటనే తన స్నేహితులను అప్రమత్తం చేశాడు.

సురేష్ మరియు అతని స్నేహితులు కొందరు ఇంటింటికీ వెళ్లి ఇరుగుపొరుగువారిని వెంటనే తమ ఇళ్లను విడిచిపెట్టి పారిపోవాలని చెప్పారు. గ్రామానికి చెందిన ఆ యువకుల బృందం ఒక గంటలో 500 కుటుంబాలను బయటకు తీసుకురాగలిగింది. తెల్లవారుజామున 4 గంటలకు ముందు, కాలినడకన, గ్రామానికి పడమర వైపుకు వెళ్ళారు. గ్రామానికి 4 కిలోమీటర్ల దూరంలో ఉన్న మేఘాద్రిగెడ్డ జలాశయం సమీపంలో వందలాది మంది ఆ బహిరంగ ప్రదేశానికి చేరుకున్నారు. అది ఎత్తులో ఉన్నందున, గ్యాస్ లీక్ అయిన ప్రభావం అక్కడ కనిపించలేదు. ప్రస్తుతం వారందరూ క్షేమంగా ఉన్నారు. ఆ యువకులు పబ్జీ ఆడటం వల్లే తమ గ్రామాన్ని కాపాడుకున్నామని తెలియజేయడం గమనార్హం.