డాక్టర్లకు హోంమంత్రి అమిత్ షా విజ్ఞప్తి....
Andhra Pradesh Telugu | Suryaa Desk | Published : Wed, Apr 22, 2020, 02:33 PM
కరోనా కేసుల్లో బాధితులు డాక్టర్లు, వైద్య సిబ్బందిపై తిరగబడుతుండటం, దాడులు చేస్తుండటంతో... ఈ అంశం కేంద్ర ప్రభుత్వ దృష్టికి వచ్చింది. డాక్టర్ల రక్షణ, గౌరవం విషయంలో మరో మాటే అక్కర్లేదన్న కేంద్ర హోంమంత్రి అమిత్ షా... డాక్టర్లకు ఎల్లవేళలా సానుకూల వాతావరణం కల్పించడం కేంద్ర రాష్ట్ర ప్రభుత్వాల సమిష్టి బాధ్యత అన్నారు. కేంద్ర ప్రభుత్వం డాక్టర్ల సమస్యలపై నిబద్ధతతో ఉందన్న అమిత్ షా... డాక్టర్లు చేయాలనుకుంటున్న ధర్నాపై పునరాలోచించుకోవాలని కోరారు. ఇందుకు సంబంధించి ఆయన వ్యక్తిగత ట్విట్టర్ అకౌంట్ ద్వారా డాక్టర్లకు ట్వీట్ రూపంలో విజ్ఞప్తి చేశారు.కేంద్రం ఇలా ప్రత్యేకంగా విజ్ఞప్తి చెయ్యడానికి కారణం డాక్టర్లు, హెల్త్ వర్కర్లు బుధువారం రాత్రి చెయ్యబోతున్న కొవ్వొత్తుల ధర్నాయే. తమపై జరుగుతున్న దాడుల్ని నిరసిస్తూ... డాక్టర్లు, వైద్య సంస్థలు... ఆస్పత్రుల సిబ్బంది... రాత్రి 9 గంటలకు వైట్ కోట్ ధరించి, కొవ్వొత్తులు వెలిగిస్తారు.కేంద్ర ప్రభుత్వం తగిన చర్యలు తీసుకోకపోతే... ఏప్రిల్ 23న తాము నల్ల బ్యాడ్జీలతో బ్లాక్ డే కూడా చేస్తామని డాక్టర్స్ విభాగం హెచ్చరించింది. అప్పటికీ కేంద్రం చర్యలు చేపట్టకపోతే... తదుపరి చర్యలుంటాయని తెలిపింది. ఐతే.. ఇకపై డాక్టర్లు, నర్సులు, హెల్త్ కేర్ వర్కర్లపై దాడులు జరగకుండా... ప్రత్యేక చట్టాన్ని తెచ్చి... దాన్ని అమలు చేసేందుకు కేంద్రం ఆర్డినెన్స్ జారీ చేయనున్నట్లు తెలుస్తోంది.
|
|