మొబైల్‌తో ఆమెను రహస్యంగా ఫోటోలు తీసే

కార్పొరేట్ ఆఫీస్‌లో మహిళల వాష్‌రూమ్‌లో ఓ ప్రబుద్ధుడు రహస్యంగా ఫోటోలు తీస్తూ పట్టుబడిన ఘటన పుణేలో చోటు చేసుకుంది. ఆ నగరంలోని ఖరాడీ ప్రాంతంలోని వరల్డ్ ట్రేడ్ సెంటర్‌లో ఉన్న ఒక ప్రైవేట్ కంపెనీలో.. సాయంత్రం పొద్దుపోయే వరకూ సమావేశం జరిగింది. మీటింగ్ పూర్తైన తర్వాత.. ఆ కంపెనీలో మానవ వనరుల విభాగంలో పనిచేసే 26 ఏళ్ల మహిళ 9.45 గంటల సమయంలో వాష్‌రూమ్‌కు వెళ్లింది. అందులో పైకప్పు ఓపెన్‌గా ఉన్న 6 టాయిలెట్లు పక్కపక్కనే ఉన్నాయి. ఆమె క్యూబికల్‌పై కూర్చున్న సమయంలో పక్క టాయిలెట్ నుంచి శబ్దం వినిపించింది. అనుమానంతో తల పైకెత్తి చూసిన ఆమె ఒక్కసారిగా హతాశురాలైంది. పక్క టాయిలెట్ పై భాగం నుంచి ఓ ప్రబుద్ధుడు.. మొబైల్‌తో ఆమెను రహస్యంగా ఫోటోలు తీసే ప్రయత్నం చేస్తున్నాడు.

భయంతో అరుస్తూ.. ఆమె వెంటనే బయటకి పరుగెత్తుకు రాగా.. అతడు ఆమె చేయిని గట్టిగా పట్టుకొని అడ్డుకున్నాడు. ఎలాగోలా వదిలించుకొని ఆమె వాష్‌రూమ్ నుంచి బయటపడి ఎమర్జెన్సీ అలారం నొక్కింది. దీంతో అలర్ట్ అయిన సెక్యూరిటీ సిబ్బంది అతడిని పట్టుకున్నారు. ‘బడ్డీ కాప్ సిస్టమ్’ ద్వారా వెంటనే సమాచారం ఇవ్వడంతో పుణే పోలీసులు వచ్చి నిందితుణ్ని అదుపులోకి తీసుకున్నారు.టాయిలెట్లను శుభ్రం చేయడానికి సదరు కంపెనీ.. ఓ సంస్థతో కాంట్రాక్ట్ కుదుర్చుకుంది. బిహార్‌కు చెందిన రాజ్‌కమల్ యాదవ్ ఆ సంస్థలో చాలా కాలం నుంచి పని చేస్తున్నాడు. ప్రతి రోజూ సాయంత్రం 9 గంటల తర్వాత వచ్చి రాజ్‌కమల్.. ఆ కంపెనీ వాష్‌రూమ్‌లను క్లీన్ చేస్తున్నాడు. రోజూలానే వచ్చిన అతడు.. ఆ సమయానికి కొంత మంది మహిళా ఉద్యోగులు అందులోకి వెళ్లడం గమనించాడు. వెంటనే అతడి బుర్రలో ఓ పాడు ఆలోచన పుట్టింది. మహిళలు టాయిలెట్లను వాడుతున్నప్పుడు రహస్యంగా ఫోన్లో చిత్రీకరిద్దామనుకున్నాడు. ఇప్పుడిలా కటకటాల పాలయ్యాడు.పోలీసులు సీసీటీవీ ఫుటేజీలను గమనించగా.. లోపల అతడు 5 నిమిషాలకుపైగా ఉన్నట్లు తెలిసింది. బాధితురాలి కంటే ముందు వాష్‌రూమ్‌లోకి వెళ్లిన మరో ఇద్దరు మహిళలు.. ఇప్పుడు తెగ కంగారుపడుతున్నారు.