ఆన్ లైన్ లో బాహుబలి 2 నకిలీ టికెట్లు

బాహుబలి 2... ఈ సినిమా విడుదలకు మరో 3 రోజుల సమయం మాత్రమే ఉంది. ఈ క్రమంలో ఇప్పటికే పలు టిక్కెట్ బుకింగ్ వెబ్‌సైట్లలో కొన్ని థియేటర్ యాజమాన్యాలు టిక్కెట్లను అమ్ముతున్నాయి. ఇప్పటికే ఆయా థియేటర్లు, మల్టీప్లెక్స్‌లలో దాదాపుగా మొదటి 5 రోజుల వరకు టిక్కెట్లన్నీ బుక్ అయినట్టు తెలుస్తోంది. ఇంకా కొన్ని థియేటర్స్ మాత్రం ఇంకా ఆన్‌లైన్ బుకింగ్స్ ఓపెన్ చేయలేదు. ఒక వేళ చేసినా అవి హాట్ కేకుల్లానే అమ్ముడుపోనున్నాయి. ఈ క్రమంలోనే బాహుబలి 2 సినిమాకు ప్రేక్షకుల్లో ఉన్న క్రేజ్‌ను ఆసరగా చేసుకుని కొందరు ప్రబుద్ధులు ఆ సినిమాకు గాను నకిలీ టిక్కెట్లను విక్రయిస్తున్నారు. ఆన్‌లైన్‌లో నకిలీ వెబ్‌సైట్లను క్రియేట్ చేసి ఆయా ప్రాంతాల్లో ఉన్న థియేటర్స్ పేర్లను ఆ సైట్లలో పెట్టి అన్ని షోలకు టిక్కెట్లను విక్రయిస్తున్నారు. 
ఆన్‌లైన్‌లో టిక్కెట్లను విక్రయించే సైట్ల గురించి తెలియని వారు ఈ నకిలీ సైట్ల బారిన పడుతున్నారు. ఇంటర్నెట్ బ్రౌజర్‌లో గూగుల్ లేదా ఇతర సెర్చ్ సైట్లు ఓపెన్ చేసి bahubali 2 movie tickets అని సెర్చ్ చేస్తే వాటిల్లో వచ్చే మొదటి పేజీల్లో దాదాపుగా మొత్తం నకిలీ సైట్లే కనిపిస్తున్నాయి. అలా వచ్చేలా ప్రత్యేకమైన ఏర్పాటు చేసి మరీ ప్రేక్షకులను మోసం చేస్తున్నారు. తాజాగా www.newtickets.in అనే ఓ నకిలీ వెబ్‌సైట్ గురించిన వార్త తెలిసింది. ఈ సైట్‌లో ఇప్పటికే పెద్ద మొత్తంలో టిక్కెట్లను విక్రయించినట్టు సమాచారం. హైదరాబాద్, చెన్నై, న్యూయార్క్, లండన్, సిడ్నీ, అబుధాబి తదితర ప్రాంతాల్లో ఉన్న థియేటర్స్‌లో బాహుబలి 2 టిక్కెట్లను కావాలనుకునే వారు తమ వెబ్‌సైట్లో కొనుగోలు చేయాలంటూ ఈ వెబ్‌సైట్ ప్రచారం నిర్వహించింది. దీంతో నిజంగానే టిక్కెట్లు ఉన్నాయని నమ్మిన ప్రేక్షకులు ఆ సైట్‌లో టిక్కెట్లను కొనుగోలు చేసినట్టు సమాచారం. అయితే ఇప్పటికే ప్రముఖ టిక్కెట్ బుకింగ్ సైట్లలో బాహుబలి 2 టిక్కెట్లు అన్నీ అమ్ముడవడంతో న్యూ టిక్కెట్స్ సైట్‌లో ఇంకా టిక్కెట్లు ఉన్నట్టు చూపిస్తుండడాన్ని చూసిన పలువురికి అనుమానం వచ్చింది. దీంతో వారు పోలీసులకు ఫిర్యాదు చేయగా, అసలు విషయం తెలిసింది. సదరు సైట్ నకిలీదేనని, ఈ మధ్యే దాన్ని రిజిస్టర్ చేశారని, బాహుబలి 2కు ఉన్న క్రేజ్ దృష్ట్యా నకిలీ టిక్కెట్లను అమ్మి సొమ్ము చేసుకోవాలన్న దుర్భుద్ధితోనే ఆ సైట్‌ను ఓపెన్ చేశారని పోలీసులు గుర్తించారు. కాగా ఇప్పటికే ఆ సైట్‌లో ఒక్కో టిక్కెట్‌ను రూ.120 పెట్టి చాలా మంది ప్రేక్షకులు టిక్కెట్లు కొన్నట్టు తెలిసింది. ఈ క్రమంలో మరో 3 రోజుల తరువాత విడుదల కానున్న బాహుబలి 2 సినిమాకు ఇలా నకిలీ టిక్కెట్లను కొన్నవారు వెళితే అప్పుడు పెద్ద సమస్య వచ్చే అవకాశం కూడా ఉంది.బాహుబలి 2 సినిమాకు నకిలీ టిక్కెట్లను విక్రయిస్తున్న దృష్ట్యా ప్రేక్షకులు ఆన్‌లైన్‌లో టిక్కెట్లను కొనేముందు జాగ్రత్తగా ఉండాలని సైబర్ నిపుణులు, పోలీసులు హెచ్చరిస్తున్నారు. టిక్కెట్ బుకింగ్ సమయంలో యూజర్ల ఈ-మెయిల్ ఐడీ, ఫోన్ నంబర్, డెబిట్, క్రెడిట్ కార్డులు, ఇంటర్నెట్ బ్యాంకింగ్ వివరాలు దుండగుల చేతుల్లోకి వెళ్లే ప్రమాదం పొంచి ఉంటుంది. ఈ క్రమంలో ఆన్‌లైన్‌లో సినిమా టిక్కెట్లను కొనే వారు ఒకటికి రెండు సార్లు ఆలోచించడం మంచిదని ఐటీ సెక్యూరిటీ నిపుణులు చెబుతున్నారు.