AI ఎఫెక్ట్.. ఈ 10 ఉద్యోగాలు భవిష్యత్తులో మాయం కావచ్చా? ఆంత్రోపిక్ రిపోర్ట్

ఆర్టిఫిషియల్ ఇంటెలిజెన్స్ (AI) ప్రభావం భవిష్యత్తులో వైట్ కాలర్ ఉద్యోగాలపై గణనీయంగా ఉండొచ్చని టెక్నాలజీ సంస్థ Anthropic సీఈఓ Dario Amodei హెచ్చరించారు. భవిష్యత్తులో ఈ టెక్నాలజీ కారణంగా కొన్ని ఉద్యోగాల్లో పని చేసే విధానం పూర్తిగా మారే అవకాశం ఉందని ఆయన పేర్కొన్నారు.దీనికి సంబంధించిన ఒక విశ్లేషణాత్మక జాబితాను కూడా సంస్థ తాజాగా విడుదల చేసింది. ఏ రంగాల్లో పనిచేసే ఉద్యోగాలపై AI ప్రభావం ఎక్కువగా ఉండొచ్చో ఈ నివేదికలో వివరించారు.అయితే AI వల్ల ఉద్యోగాలు వెంటనే పూర్తిగా మాయం అవుతాయని కాదు. కానీ, చాలా పనులు ఆటోమేటిక్‌గా జరిగే విధంగా పని విధానంలో మార్పులు చోటుచేసుకుంటాయని నిపుణులు చెబుతున్నారు. ప్రస్తుతం కంప్యూటర్ ప్రోగ్రామింగ్ నుంచి కస్టమర్ సర్వీస్, డేటా ఎంట్రీ వంటి పనుల్లో ఇప్పటికే AI వినియోగం వేగంగా పెరుగుతోంది. ముఖ్యంగా మనుషులు చేసే కొన్ని రొటీన్ పనులను AI సులభంగా నిర్వహించగలదని ఈ రిపోర్ట్ చెబుతోంది. ఈ నేపథ్యంలో సుమారు 10 రకాల ఉద్యోగాల్లో AI ప్రభావం ఎక్కువగా ఉండొచ్చని పేర్కొన్నారు.ఈ జాబితాలో మొదటి స్థానంలో కంప్యూటర్ ప్రోగ్రామర్లు ఉన్నారు. వారి పనిలో దాదాపు 74.5 శాతం పనులను AI నిర్వహించే సామర్థ్యం ఉందని అంచనా వేస్తున్నారు. తర్వాత కస్టమర్ సర్వీస్ రంగంలో 70.1 శాతం పనులు, డేటా ఎంట్రీ ఆపరేటర్ల పనుల్లో 67.1 శాతం వరకు AI చేయగలదని విశ్లేషణ చెబుతోంది. అలాగే మెడికల్ రికార్డ్ స్పెషలిస్టుల పనుల్లో 66.7 శాతం, మార్కెట్ రీసెర్చ్ మరియు మార్కెటింగ్ నిపుణుల పనుల్లో 64.8 శాతం వరకు AI పాత్ర పెరిగే అవకాశం ఉంది.ఇదే సమయంలో సేల్స్ ఉద్యోగాల్లో 62.8 శాతం, ఫైనాన్షియల్ మరియు ఇన్వెస్ట్‌మెంట్ అనలిస్టుల పనుల్లో 57.2 శాతం వరకు AI ప్రభావం ఉండొచ్చని అంచనా. అలాగే సాఫ్ట్‌వేర్ క్వాలిటీ టెస్టర్లు (51.9 శాతం), ఇన్ఫర్మేషన్ సెక్యూరిటీ అనలిస్టులు (48.6 శాతం) మరియు కంప్యూటర్ యూజర్ సపోర్ట్ స్పెషలిస్టులు (46.8 శాతం) కూడా ఈ జాబితాలో చోటు దక్కించుకున్నాయిఅయితే ఈ ఉద్యోగాలు పూర్తిగా అంతరించిపోతాయని అర్థం కాదు. కానీ ఆ ఉద్యోగాల్లో చేసే పనుల్లో గణనీయమైన భాగాన్ని AI నిర్వహించే అవకాశం ఉంది. దీంతో భవిష్యత్తులో కొన్ని రంగాల్లో మనుషుల అవసరం తగ్గే అవకాశముందని నిపుణులు చెబుతున్నారు.ప్రస్తుతం అందుబాటులో ఉన్న సమాచారం ప్రకారం AI కారణంగా పెద్ద ఎత్తున ఉద్యోగాలు కోల్పోతున్నట్లు స్పష్టమైన ఆధారాలు లేవు. కానీ కొత్తగా ఉద్యోగాల్లోకి వచ్చే వారికి అవకాశాలు తగ్గడం లేదా కంపెనీలు సాధారణ పనుల కోసం AIను ఎక్కువగా వినియోగించడం ప్రారంభించినట్లు తెలుస్తోంది.AI మనిషికి సహాయకంగా మారుతుందా లేక ఉద్యోగాలకు ముప్పుగా మారుతుందా అన్నదానిపై ప్రపంచవ్యాప్తంగా చర్చ కొనసాగుతోంది. ఒక విషయం మాత్రం స్పష్టంగా కనిపిస్తోంది — టెక్నాలజీ వేగంగా మారుతున్న ఈ కాలంలో మనం కూడా కొత్త నైపుణ్యాలను నేర్చుకుంటూ మార్పులకు అనుగుణంగా ముందుకు సాగాల్సిన అవసరం ఉంది.