డ్వాక్రా మహిళలకు .. రూ. 3 లక్షల వరకూ వడ్డీ లేని రుణం

డ్వాక్రా మహిళల కోసం ప్రభుత్వాలు అనేక కార్యక్రమాలు చేపడుతూ ఉంటాయి. మహిళల ఆర్థికాభివృద్ధి కోసం తక్కువ వడ్డీకి రుణాలు, ఒక్కోసారి వడ్డీ లేని రణాలు అందిస్తు్ంటాయి. అలాంటి అద్భుత అవకాశమే ఇప్పుడు మరోసారి డ్వాక్రా మహిళల ముందు ఉంది. లక్ష రూపాయల నుంచి రూ.3 లక్షల వరకూ వడ్డీ లేని రుణం పొందడమే కాకుండా.. అందులో 50 వేల రూపాయలు రాయితీ కూడా లభించనుంది. అయితే ఇది కేవలం శ్రీసత్యసాయి జిల్లాలోని డ్వాక్రా మహిళలకు మాత్రమే. అందులోనూ ఎస్సీ మహిళలకు మాత్రమే ఇప్పుడు ఈ అవకాశం ఉంది. శ్రీసత్యసాయి జిల్లాలోని ఎస్సీ మహిళలకు ప్రభుత్వం వడ్డీ లేని రుణం అందిస్తోంది. వీరికి రుణాలు అందించేందుకు పీఎం అజయ్ పథకం కింద 130 యూనిట్లను జిల్లాకు కేటాయించారు. అయితే ఈ రుణాలు పొందేందుకు పొదుపు సంఘాలలోని ఎస్సీ మహిళలు మాత్రమే అర్హులు.

వీరికి ప్రధానమంత్రి అనుసూచిత జాతీయ అభ్యుదయ యోజన కింద వడ్డీ లేని రుణాలు అందిస్తారు. ఈ మేరకు ఏపీ గ్రామీణ పేదరిక నిర్మూలన సంస్థ (సెర్ప్) సీఈవో ఆదేశాలు జారీ చేశారు. ఇందులో భాగంగా 20 ఏళ్ల నుంచి 35 ఏళ్లలోపు ఉన్న డ్వాక్రా మహిళలకు రూ.లక్ష నుంచి రూ.3 లక్షల వరకూ వడ్డీ లేని రుణం అందిస్తారు. ఇందులో 50 వేల రూపాయల రాయితీ కూడా ఇస్తారు. ఈ డబ్బులతో ఆటోలు తీసుకునే వీలుంది. అలాగే బ్యూటీపార్లర్లు, చీరలు, దుస్తులు, కేఫ్‌లు, శీతల పానీయాలు వంటి యూనిట్లు ఏర్పాటు చేసుకోవచ్చని అధికారులు వెల్లడించారు. ఎస్సీ మహిళల జనాభా ప్రాతిపదికన మండలాల వారీగా యూనిట్లు కేటాయిస్తామని.. మండలాల్లోని మహిళా సమాఖ్యలను సంప్రదించి దరఖాస్తు చేసుకోవాలని మహిళలకు సూచించారు.

ప్రధానమంత్రి అనుసూచిత జాతీయ అభ్యుదయ యోజన అనే పథకం కేంద్ర సామాజిక న్యాయం, సాధికారత మంత్రిత్వ శాఖ పరిధిలోని ఒక పథకం. షెడ్యూల్డ్ కులాలలో సామాజిక-ఆర్థిక అభ్యుదయాన్ని, నైపుణ్యాలను పెంపొందించడంతో పాటుగా, ఆదాయాన్ని సృష్టించడం, మౌలిక సదుపాయాలను మెరుగుపరచడం ఈ పథకం ఉద్దేశం.

ఈ పథకం కింద ఎస్సీ జనాభా ఎక్కువగా ఉన్న గ్రామాల్లో నైపుణ్య అభివృద్ధి, స్వయం ఉపాధి, మౌలిక సదుపాయాలకు నిధులు అందిస్తారు. ఎస్సీ సామాజికవర్గంలో పేదిరకాన్ని తగ్గించటంతో పాటుగా సామాజిక, ఆర్థిక అభివృద్ధిని సాధించడం పీఎం అజయ్ పథకం ఉద్దేశం. ఈ క్రమంలోనే శ్రీసత్యసాయి జిల్లాలోని ఎస్సీ మహిళల జీవనోపాధి కోసం 130 యూనిట్లు మంజూరు చేశారు. ఈ యూనిట్ల కింద వడ్డీ లేని రుణాలు అందించనున్నారు.