దిత్వా తుఫాను ముప్పు.. రేపు, ఎల్లుండి భారీవానలు

ఏపీని దిత్వా తుఫాను ముప్పు భయపెడుతోంది. నైరుతి బంగాళాఖాతంలో దిత్వా తుఫాను కేంద్రీకృతమై ఉంది. శనివారం మధ్యాహ్నం మూడు గంటల సమయానికి దిత్వా తుఫాను కారైకాల్‌కి 150 కి,మీ.,పుదుచ్చేరికి 250 కిలోమీటర్లు, చెన్నైకి 350కి.మీ దూరంలో కేంద్రీకృతమై ఉందని ఏపీ విపత్తుల నిర్వహణ సంస్థ వెల్లడించింది. గత ఆరు గంటలుగా దిత్వా తుఫాను గంటకు పది కిలోమీటర్ల వేగంతో కదులుతున్నట్లు అంచనా వేసింది. ఈ నేపథ్యంలో ఆదివారం తెల్లవారుజామునకు దిత్వా తుఫాను తమిళనాడు, పుదుచ్చేరి, దక్షిణకోస్తాంధ్ర తీరాలకు చేరుకునే అవకాశం ఉందని ఏపీ విపత్తుల నిర్వహణ సంస్థ ఎండీ ప్రఖర్ జైన్ వెల్లడించారు. అనంతరం తుఫాను.. తీవ్రవాయుగుండంగా మారే అవకాశం ఉందని వాతావరణ శాఖ అధికారులు చెప్తున్నారు.

దిత్వా తుఫాను ప్రభావంతో శనివారం రోజున చిత్తూరు, తిరుపతి జిల్లాల్లో భారీ వర్షాలుకురుస్తాయని ఏపీ విపత్తుల నిర్వహణ సంస్థ తెలిపింది. శ్రీపొట్టి శ్రీరాములు నెల్లూరు, ప్రకాశం, కడప, అన్నమయ్య జిల్లాల్లో కొన్నిచోట్ల మోస్తరు నుంచి భారీ వర్షాలు కురిసే అవకాశం ఉన్నట్లు వెల్లడించింది. ఈ నేపథ్యంలో మంగళవారం వరకు సముద్రంలోకి చేపల వేటకు వెళ్లొద్దని మత్స్యకారులకు సూచించింది. ప్రజలు, రైతులను కూడా అప్రమత్తం చేసింది.

మరోవైపు దిత్వా తుఫాను నేపథ్యంలో ఏపీ హోం మంత్రి వంగలపూడి అనిత అధికారులతో సమీక్షించారు. ఏపీ విపత్తుల నిర్వహణ సంస్థ కార్యాలయంలో ఉన్నతాధికారులతో సమీక్ష నిర్వహించారు. ఈ సందర్భంగా దిత్వా తుఫాను తీవ్రతను ఎప్పటికప్పుడు అంచనా వేసి ప్రభావిత జిల్లాలను అప్రమత్తం చేయాలని అధికారులను ఆదేశించారు. తుఫాను ప్రభావిత జిల్లాల కలెక్టర్లతో మాట్లాడాలని.. ముందస్తు జాగ్రత్తలు తీసుకోవాలని హోం మంత్రి అధికారులకు సూచించారు. అత్యవసర పరిస్థితులలో సహాయక చర్యల కోసం ఎస్‌డీఆర్‌ఎఫ్‌, ఎన్డీఆర్‌ఎఫ్‌ బృందాలను తుఫాను ప్రభావిత ప్రాంతాలకు పంపించాలని ఆదేశించారు.

మరోవైపు దిత్వా తుఫాను ప్రభావంతో ఆదివారం, సోమవారం దక్షిణ కోస్తా జిల్లాల్లో కొన్నిచోట్ల భారీ వర్షాలు కురిసేందుకు అవకాశం ఉందని విపత్తుల నిర్వహణ అధికారులు హోంమంత్రికి వివరించారు. ఈ నేపథ్యంలో భారీ వర్షాల కారణంగా ప్రాణనష్టం జరగకుండా చర్యలు తీసుకోవాలని .. తుఫాను సమాచారాన్ని ఎప్పటికప్పుడు ప్రజలకు తెలియజేయాలని సూచించారు. క్షేత్ర స్థాయిలో అధికారులు అనుక్షణం అప్రమత్తంగా ఉండాలని హోంమంత్రి ఆదేశించారు. మరోవైపు భారీ వర్షాలు కురిసే అవకాశాన్ని దృష్టిలో ఉంచుకుని ప్రజలు వీలైనంత వరకు ఇంట్లోనే సురక్షితంగా ఉండాలని హోం మంత్రి అనిత విజ్ఞప్తి చేశారు. అత్యవసర సహాయక చర్యల కోసం టోల్‌ ఫ్రీ నంబర్లు 112, 1070, 1800-425-0101లో సంప్రదించాలని సూచించారు.