ఏపీ సమగ్రాభివృద్ధి కోసం కొత్త స్కెచ్.... చంద్రబాబు ప్లాన్

ఆంధ్రప్రదేశ్ రాష్ట్రం సమగ్రాభివృద్ధి కోసం ముఖ్యమంత్రి నారా చంద్రబాబు నాయుడు మరో కీలక నిర్ణయం తీసుకున్నట్లు తెలుస్తోంది. రాయలసీమ, కోస్తా, ఉత్తరాంధ్ర జిల్లాల అభివృద్ధే ధ్యేయంగా సరికొత్త ప్రణాళికలు రచిస్తున్నట్లు సమాచారం. ఇందులో భాగంగా రాష్ట్రంలోని మూడు ప్రాంతాల అభివృద్ధి కోసం జోన్లు ఏర్పాటు చేయాలని భావిస్తున్నారు సీఎం చంద్రబాబు నాయుడు. శనివారం రోజున మీడియాతో జరిగిన చిట్ చాట్ సందర్భంగా సీఎం చంద్రబాబు ఈ విషయాన్ని వెల్లడించారు. ఏపీలోని మూడు ప్రాంతాల అభివృద్ధే తమ ప్రభుత్వం లక్ష్యమని.. అందుకు అనుగుణంగా పనిచేస్తున్నట్లు చంద్రబాబు తెలిపారు. ఇందులో భాగంగా రాష్ట్రంలోని మూడు ప్రాంతాల అభివృద్ధి కోసం ప్రత్యేక జోన్లు ఏర్పాటు చేస్తామని చంద్రబాబు తెలిపారు. అలాగే రాజధాని రైతులంతా అమరావతి ప్రాంత అభివృద్ధి అసోసియేషన్‌ కిందకు రావాలని చంద్రబాబు సూచించారు. వారందరూ కలిసి జేఏసీగా ఏర్పడితే సమస్యల పరిష్కారం సులభమవుతుందని అభిప్రాయపడ్డారు.

మరోవైపు రాయలసీమ ప్రాంతం అభివృద్ధికి ఏపీ ప్రభుత్వం అనేక చర్యలు చేపడుతోంది. రాయలసీమ ప్రాంతాన్ని ఉద్యానవన హబ్‌గా మార్చేందుకు ప్రయత్నిస్తోంది. ఇందులో భాగంగా పూర్వోదయ పథకం కింద రాయలసీమ ప్రాంతానికి రూ.40 వేలకోట్లతో ఓ సమగ్ర ప్రణాళిక అమలుచేసేందుకు కసరత్తు జరుపుతోంది. క్లస్టర్ల ద్వారా ఈ ప్రాంతంలో ఉద్యానవన పంటల సాగును ప్రోత్సహించేందుకు ప్రభుత్వం చర్యలు తీసుకుంటోంది. ముఖ్యంగా ఇతర దేశాల్లోనూ డిమాండ్ ఉన్న అరటి, మామిడి, దానిమ్మ, బొప్పాయి వంటి పంటల సాగును ప్రభుత్వం ప్రోత్సహించాలని భావిస్తోంది. రాయలసీమ రైతులకు డ్రిప్ రాయితీలు అందించటంతో పాటుగా వారి పంటలకు మెరుగైన మార్కెటింగ్ సౌకర్యాలు, ఫుడ్ ప్రాసెసింగ్ యూనిట్లు, ఎగుమతుల కోసం ఎయిర్ కార్గో ఏర్పాట్లు కల్పించడంపై దృష్టి పెట్టింది. సాగునీటి ప్రాజెక్టులను త్వరితగతిన పూర్తి చేసేందుకు కూడా చర్యలు తీసుకుంటోంది. అలాగే డ్రోన్ సిటీ, స్పేస్ సిటీ, డిఫెన్స్ కారిడార్ల వంటివి ఏర్పాటు చేసేందుకు ఆలోచనలు చేస్తున్నారు.

ఇక ఉత్తరాంధ్ర అభివృద్ధి కోసం నీటిపారుదల ప్రాజెక్టులకు ప్రభుత్వం అధికంగా ప్రాధాన్యం ఇస్తోంది. ఈ ప్రాంతానికి అతి ముఖ్యమైన ఉత్తరాంధ్ర సుజల స్రవంతి ప్రాజెక్టును త్వరితగతిన పూర్తి చేయాలని లక్ష్యంగా పెట్టుకున్నారు. పెండింగ్ ప్రాజెక్టులను పూర్తి చేయడంతో పాటుగా చెరువుల అభివృద్ధికి చర్యలు తీసుకుంటున్నారు. భోగాపురం అంతర్జాతీయ విమానాశ్రయాన్ని గడువులోగా పూర్తి చేసి అందుబాటులోకి తెస్తే.. ఉత్తరాంధ్ర ప్రాంతం ఆర్థికాభివృద్ధికి తోడ్పడుతుందని భావిస్తున్నారు. అలాగే విశాఖపట్నం, ఆ చుట్టు పక్కల జిల్లాలలో ఐటీ పరిశ్రమల అభివృద్ధికి ప్రభుత్వం అధిక ప్రాధాన్యం ఇస్తోంది. టీసీఎస్, కాగ్నిజెంట్, గూగుల్, లులూ, యాక్సెంచర్ వంటి అంతర్జాతీయ సంస్థలు అక్కడ పెట్టుబడి పెట్టేలా ప్రభుత్వం చర్యలు చేపడుతోంది.

ఇక కోస్తా ప్రాంతం విషయానికి వస్తే.. ఈ ప్రాంతంలో వ్యవసాయంతో పాటుగా పర్యాటకం, మౌలిక వసతుల కల్పన, పారిశ్రామిక అభివృద్ధిపై ప్రభుత్వం దృష్టి పెట్టింది. తీర ప్రాంతం వెంబడి బీచ్‌లను అభివృద్ధి చేసి.. పర్యాటకులకు ఆకర్షించాలని భావిస్తున్నారు. అలాగే పోర్టులను అభివృద్ధి చేసి ఈ ప్రాంతాన్ని లాజిస్టిక్ హబ్‌గా మార్చాలని ప్రభుత్వం భావిస్తోంది.