ఫిఫా ప్రపంచకప్‌ ఫైనల్‌కి చేరిన ఫ్రాన్స్
Andhra Pradesh Telugu | Suryaa Desk | Published : Wed, Jul 11, 2018, 09:34 AM
రష్యా వేదికగా జరుగుతున్న ఫిఫా ప్రపంచకప్‌ ఫైనల్లో ఫ్రాన్స్ అడుగుపెట్టింది. బెల్జియంతో మంగళవారం అర్ధరాత్రి జరిగిన తొలి సెమీ ఫైనల్ మ్యాచ్‌లో బెల్జియంను 1-0 తేడాతో మట్టికరిపించిన ఆ జట్టు రెండోసారి కప్‌ని ముద్దాడేందుకు అడుగు దూరంలో నిలిచింది. 1998లో తొలిసారి ఫిఫా వరల్డ్‌కప్‌ను గెలిచిన ఫాన్స్.. ఆ తర్వాత 2006లో ఫైనల్ చేరినా.. అక్కడ ఇటలీ చేతిలో అనూహ్యంగా ఓడిపోయి కొద్దిలో కప్‌ను చేజార్చుకుంది.
ఈ మ్యాచ్‌లో బెల్జియం జట్టు హాట్ ఫేవరెట్‌గా బరిలోకి దిగింది. దీనికి కారణంగా.. గత 24 అంతర్జాతీయ మ్యాచ్‌ల్లో బెల్జియానికి ఓటమే లేదు. మరోవైపు ఫ్రాన్స్ కూడా ఈ టోర్నీలో అద్భుత ప్రదర్శనని కొనసాగిస్తుండటంతో.. మ్యాచ్‌ ఉత్కంఠగా సాగింది. డిఫెన్స్, ఎటాకింగ్‌‌తో రెండు జట్లూ నువ్వా-నేనా అన్నట్లు పోరాడటంతో.. మ్యాచ్‌లో 50వ నిమిషం వరకూ కనీసం ఒక గోల్‌ కూడా నమోదవలేదు. కానీ.. 51వ నిమిషంలో శామ్యూల్ ఉమ్మటి హెడర్‌ గోల్‌తో ఫ్రాన్స్‌కి 1-0తో ఆధిక్యం అందించాడు. దీంతో.. ఒత్తిడికి గురైన బెల్జియం ఆఖరి వరకూ ఆధిక్యాన్ని సమం చేసేందుకు ప్రయత్నించినా.. ఆ జట్టుకి నిరాశే ఎదురైంది. బెల్జియం ఇప్పటి వరకు కనీసం ఒకసారి కూడా ఫిఫా ప్రపంచకప్‌ ఫైనల్‌కి చేరలేదు. దీంతో.. కప్‌ మరోసారి వారికి అందని ద్రాక్షే అయ్యింది..!!
|
|